Cu e deadline pa entrega un propuesta na gobierno Hulandes pa dia 1 di september, tras di lomba y sin un claridad riba esey, ta surgi varios pregunta con e situacion aki lo sigui. Si no tin un propuesta entrega na tempo esaki lo tin consecuencia financiero pa e tasa di interes cu lo aplica den caso di e prestamo cu gobierno di Aruba por extende a base di un acuerdo pa esaki. Lo keda paga interes halto te cu finalmente lo tin un acuerdo. Despues lo por aplica e tasa di interes mas abao manera proponi pa Hulanda den nan oferta. Tur esaki ta segun e anuncio di secretario di estado Hulandes cu a adverti pa e tardanza di gobierno di Aruba pa bin cu nan proposicion.

Sin embargo, si no tin claridad ainda si gobierno di Aruba a duna un contesta y no ta haci por lo tanto un (contra)propuesta, kico lo ta e ‘next step’? E siguiente paso ta encera dos asunto. Uno ta e prestamo mes, e otro e supervision financiero cu mester keda regla. E consecuencia cu Hulanda lo aumenta e tasa di interes pa e prestamo di e fondonan Hulandes, no lo haci mucho impresion pa gobierno di Aruba, pasobra nan no mester di paga esaki.

Pero pakico lo gobierno tuma e paso impopular aki, sin miedo pa e consecuencia politico local? Esaki ta debi na e situacion politico actual, unda no ta mira un oposicion fuerte, cu por significa un menaza serio pa e actual gobierno. Di un banda nos por mira un partido democrata cristian cu a perde practicamente tur credito cu nan por tabatin pa e forma con nan ta cana braza cu delincuencia den e partido, ademas cu den e asunto di e ley di Reino e partido menciona aki tambe kier mantene e ley cu nan a introduci. E demas partidonan ta keda cu e handicap casi natural di partido chikito, limita den tanto recurso financiero como apoyo humano. Por lo tanto esaki por crea optimismo pa e coalicionden e proximo eleccion, si nada no cambia. Mester tene cuenta anto cu un gobierno cu no ta importa busca un confrontacion cu Hulanda cu un rotundo NO.

Esaki ta pone e bala den cancha di Hulanda; e opcionnan no ta sin complicacion. En principio Hulanda ta e banco y Aruba e fiador, y manera den bida real, den deliberacion mas tanto e banco ta bisa e fiador ta kico ta bay haci. Keda nenga di acepta un propuesta ta significa na october cu Aruba ta ‘default’ riba un prestamo, loke no lo sucede sin bira noticia internacional y haci haya prestamo faborable riba mercado internacional mas dificil ainda, mientras Hulanda no ta bay yuda cu esey.

Sin embargo, e asunto di supervision ta mas problematico ainda. Si gobierno di Aruba ta bisa cu ta keda nenga e propuesta di e ley di Reino, con lo para cu e supervision? Mientras no tin ley di Reino, e ley di Aruba (LAft) ta keda vigente. Cu esey e supervision finaltoch ta keda den man di gobierno di Reino, segun e propio ley di Aruba. Un aspecto poco tuma na cuenta ta cu e ley aki tabasa, segun su Considerando,riba articulo 52 di Statuut, cu ta brinda e posibilidad pa otorga gobierno di Reino algun facultad specifico encuanto asuntonan di e pais (“landsaangelegenheden”).Nos por a lesa den un carta di dos parlamentario di e partidonan di coalicion, manda pa gobierno Hulandes, cu nan ta mantene e opinion cu administracion(beheer) y supervision(toezicht)financiero ta asunto di e pais. Esaki ta corecto pa administracion pero no completamente pa supervision. E administracion ta en principio un asunto Arubano, y Staten ta vigila loke gobierno ta haci, te dia bin intervencion di Reino, y ta ey supervision di Reino ta bin aden. Importante ta cu no ta trata solamente di e mencion di articulo 52 di Statuut den e ley di Aruba, pero mester considera tambe loke articulo 51 di Statuut, cu realmente mester lesa en conhunto cu articulo 52, ta bisa: “Ora un organo na Aruba, Curaçao o Sint Maarten no ta provee, o no suficientemente ta provee, den locual segun Statuut, un areglo internacional, un ley di Reino o un algemene maatregel van rijksbestuur mester cumpli, bao indicacion di e basenan legal y e motibonan pa tal, un Algemene Maatregel Van Rijksbestuur(AMVR; red.) por determina di cual manera lo provee den esaki.” Conclusion: si ta lesa articulo 51 bon, lo tabatin un fayo, un incumplimento,pa cual ta scoge, segun articulo 52, como solucion e landsverordening LAft. E fayo ey lo mester ta basa riba e AMVR di 2014, unda intervencion den asunto financiero di gobierno di Reino a inicia. Hulanda no tabata contento con cos a sigui y na 2015 tabata kier un ley di Reino. Finalmente a yega na e acuerdo pa pone e facultadnan (bevoegdheden) di gobierno di Reino den e LAft, pa supervisa y tuma decision den caso cu ta necesario, pa obliga gobierno di Aruba cumpli.

Tur esaki ta duna mas claridad ainda riba e ‘desencanto’ Hulandes tempo cu unilateralmente gobierno di Aruba y su fraccionnan den Staten na 2019 a purba ‘elimina’ gobierno di Reino for di e Laft. Mirando e situacion cu por surgi awor, si Aruba ta keda nenga un ley di Reino, Hulanda ta para dilanti e decision dificil di concreta nan supervision financiero den un AMVR atrobe. E asunto no mester yega asina leu, pero no ta mira – ainda – e sano huicio pa evita esaki.