– Si Aruba kier su studiantenan bin bek e mester cuminsa scuchanan, E hoben Stephanie Arends ta bisa. Cabando cu su estudio di International Media and Communications na Utrecht, e hoben ta conta nos di con su bida a cambia despues cu el a bin Hulanda.
“Mi a yega Hulanda na aña 2012. Mescos cu tur studiante nobo biniendo Hulanda e unico cos cu ami tawata pensa riba dje ta porfin mi por sali for di di Aruba, porfin mi por ta ken mi semper tawata kier ta. Paso na Aruba di chikito caba nan ta pone bo den un categoria y ta hopi dificil pa mustra nan cu bo a crece y bo no ta mesun persona di antes. Pero ora ma yega Hulanda ta ora mi a realisa con facil bida na Aruba tawata, na Aruba ya casi tur hende sa ken bo ta caba y nan tin nan opinion di bo. Ki nan ainda tur hende falta forma nan opinion, esey ta unda ami a cuminsa drenta panico. Na prome instancia y puntra mi mes ken mi kier ta? of miho ainda ken mi kier e hendenan aki kere cu mi ta y con mi t’ey straal esaki uit. Mi a realisa cu pasobra nan a pone mi den un categoria, na Aruba nunca mi mester a descubri ken mi ta, paso nan a haci esey pa mi caba. Ora ma yega aki mi a ripara mi no sa ken mi ta. Mi mester bisa e prome aña na Hulanda ta esun mas dificil pero esun mas importante pa descubri y siña conoce bo mes, sin influencia di bo mayornan y sin influencia di bo cultura. Te ainda mi no sa ken mi ta 100% pero sikiera aki nan mi tin e posibilidad pa haya sa pa mi mes.” E hoben ta subraya.
Prome opcion no ta miho
Como hopi otro hoben, Arends tambe a cambia di estudio despues di e prome aña pasobra su prome escogencia no a cay na su agrado. E ta bisa ‘Na Aruba ma haci VWO paso mi tabata tin den mi cabes ta universidad mi kier bay, ora ma yega akinan min kier a tende mes di HBO paso min haci VWO 7 aña largo pa mi no bay universidad. Wel ma bay universidad y ata ma ripara cu e manera di studia na universidad no tawata algo pa mi. Mi tawata bay scol y bin cas traha huiswerk henter dia pa e mainta despues mi lanta trempan y sigui traha pa mi caba paso e siguiente dia lo tin mas cos ainda. Mi ripara cu mi no tawata feliz y pa via di esey scol no tawata bayendo bon. Tawata tin hasta un punto cu mi kier a djis bay Aruba bek y cuminsa e aña siguiente di nobo pero danki na mi tata cu a bisa mi no, bo ta keda eynan y bo ta sigui haci bo best y si mi kier cambia mi ta cambia e aña escolar despues. E berdad ta si mi mayor a duna mi kier y laga mi bay bek Aruba mi probablemente no a lo a bin bek. Mayornan tin hopi influencia riba nan yiunan akinan, specialmente cu e prome aña ta esun mas dificil. Mi tata a push mi pa keda y te hasta bisa mi bo no ta bin bek december e prome aña paso mi mester a siña den bon of den malo.
Fast forward aña 2016 y awo mi ta den mi ultimo aña di HBO. E decision cu mi a haci e prome aña di cambia di estudio tawata e miho decision cu mi por a haci y tambe cu mi tata a forsa mi sinta y pasa door di e mal tempo y no a laga mi core bay bek Aruba y sconde den mi comfort zone. HBO a duna mi e oportunidad pa conoce hende di full rond mundo, e la duna mi e oportunidad di bay scol pero tambe tin tempo pa mi mes despues di scol, el a duna mi e oportunidad pa bay afo stage na California. Universidad of HBO un no ta miho cu otro, e ta depende na bo ki tipo di persona bo ta y ki ta fit pa bo. Mi a bin cu mi ruman Hulanda, e la haci HAVO na Aruba y su prome aña na Hulanda tambe el a kies otro estudio pero ata nos ki awo den HBO hunto haciendo e mesun estudio, e ta djis mustra cu loke bo kies bo prome aña no ta locual bo tin cu keda haci, ta okay bay cambia di estudio y kies algo diferente.”
Aruba bayendo atras
Arends ta comenta cu e no ta mucho contento cu e manera cu cosnan ta anda na Aruba y tur ora cu e bay bek e ta haya su mes un poco mas desapunta.
“Tur biaha mi bay Aruba bek, mi ta ripara mas y mas con grandi e distancia entre ami y mi pais ta. Mi stima Aruba cu henter mi curason, pero e ta duna mi dolor na mi curason pa wak con atras e ta bay dia pa dia. Nan ta bisa nan kier studiantenan bin bek ora nan caba di studia pero con nan kier nos haci esey si nan no kier duna nos un chens di cambia e pais y hib’e dilanti. Ora un hoben kier duna su opinion nan ta core bis’e “ki abo sa” na luga di puntra “cu ki bo por yuda”. Si Aruba echt tawata kier su studiantenan bek, e la cuminsa scucha mas over di loke nan tin di bisa.
Mi ta haya si hopi importante pa tur studiante bay afo, no mester ta 4 aña largo pero si ta pa curso mes please bay afo. Asina bo ta saca bo mes di Aruba pa bo por wak, sin influencia di mayornan, radio of television con Aruba ta di berdad. Experencia otro pais pa bo sa con otro hende ta biba, pa bo siña cu tin diferente manera pa haci un cos. Cu loke bo mayornan a siña bo ta djis un banda di e moneda. Aruba tin asina tanto hoben cu asina tanto idea pero nan no ta scucha di nan. Ora e hobennan aki laga Aruba y busca un bida miho pa nan mes, hende kier puntra “unda nos hobennan ta, uza boso stem” nan tin cu compronde cu nos no tin stem mas, nos a grita te cu no por mas pero Aruba no kier scucha.” E hoben ta finalisa .
