Si acepta condicion di Hulanda pa ayudo di likides; Edad di pensioen y sistema fiscal di Aruba lo ta similar cu esun di paisnan BES

Reorganisacion segun e plan di Entidad di Reforma Caribense ta implica un cambio grandi riba e sistema fiscal di Aruba. E entidad lo ehecuta investigacionnan riba e sistema, incluso inkomstenbelasting.

Ta considerando pa amplia e base di belasting, unda ta hala di belasting directo pa indirecto, y introduccion di Value Added Tax di 12.5 porciento, segun recomendacion di e Departamento di Asuntonan Fiscal di IMF of ABB segun e structura fiscal di Caribe Hulandes.
Lo limita e forma con ta reduci belasting pa medio di por ehempel donacion of contribucion na tercer partidonan. Lo limita e autoridad discrecionario cu tanto ambtenaar como dirigentenan tin pa dicidi kico por kita for di belasting, entre otro e asina yama ‘tax holiday.’ Y servicio di impuesto lo ricibi informacion necesario for di banconan.

Sector Financiero

Ya cuminsando 15 di September lo inicia un revision di sector financiero pa medio di un instancia independiente externo. E resultado di e revision aki lo produci medidanan pa atende cu buraconan. Si logra realisa un sector financiero stabiel, e lo por contribui na crecemento economico real. Lo enfoca riba regulacion unda tin supervision adecuado pa percura cu ta implementa e leynan. Consecuentemente lo mester tin instancia cu tin autoridad pa actua na momento cu tin problema den empresanan financiero. Den e sentido aki ta investiga kico ta e costonan di un moneda propio compara cu uzo di dollar. E decision riba un structura monetario desea lo ta basa riba resultado di esaki. E punto aki ta yamativo mirando e inversion grandi cu Banco Central di Aruba a haci pa emiti biyetenan nobo, segun exigencianan internacional. Es mas, e tarea di Banco Central di Aruba ta pa hiba control riba maneho monetario. En todo caso lo mester adapta leynan, pa despues sigura nan implementacion.

Economia

Reforma economico lo ta sosteni pa un maneho di mercado laboral actualisa y modernisa. Medidanan manera reduccion di ora di trabou, trabou part-time, facilitacion di e ley di retiro, y eliminacion di estorbonan pa trahado di afo, y pasonan pa contraresta desempleo hubenil lo ta den e evaluacion. Tambe lo midi e grandura di economia informal, y lo busca forma pa para uzo di trahadonan indocumenta. E investigacion lo mester produci maneho formula ya pa 1 di November proximo.

Edad di Pensioen lo subi

Locual a yama atencion ta e propuesta pa hisa edad di pensioen te na 66 aña na 2023 y 67 na 2025.

Specifico pa Aruba ta un ponencia cu desde introduccion di e LTU nobo, bou encargo e tempo di drs. Candelario Booshi Wever ta den disputa, esta cu miembronan di famia di ambtenaarnan di Reino tin entrada legal na Aruba. Na e momentonan aki tin un proceso mas agil compara cu esnan cu mester pidi permiso, pero asina mes, nan ta obliga na pidi permiso di estadia.