Lean On Me Foundation Aruba a lansa durante weekend nan proyecto mas nobo pa yuda e adictonan di Aruba, “Shower on Wheels”. Den un entrevista pa Bon Dia Aruba presidente di e fundacion, Sr. Francis Lacle, ta elabora ariba e trabounan di e fundacion, con e fundacion a nace y tambe kico e proyecto “Shower on Wheels” ta.

Lean On Me Aruba Foundation tin como meta pa yuda e adictonan ariba caya di Aruba. Sr. Lacle ta conta cu basa ariba su propio experiencia el a cuminsa cu e fundacion aki. 20 aña pasa el a sali di un bida di adiccion y e ta duna danki na Dios cu a yude sali for di e bida ey.

Aña pasa Sr. Lacle a bolbe cay back den adiccion di alcohol y e tabata envolvi den un accidente unda cu el a kibra su pianan y mester a keda ariba cama pa un tempo. Door cu e tabata riba cama sin por a move, ni a cana, ni haci nada el a cuminsa tende di Dios atrobe, bay den su palabra, scucha di dje. Despues cu el a recupera y el a cuminsa traha atrobe el a sinti e obligacion pa cuminsa subi caya y yuda e adcitonan.

Den un periodo di cinco luna, juni 2020 pa ongeveer october 2020 Dios tabata bisami cu e kier mi cuminsa subi caya y brinda ayudo na e adictonan. Prome instancia mi no tabata dispuesto pa hacie pasobra mi sa cu ora Dios pidibo algo e ta costa algo, e ta costa tempo, bo mester pone otro cos den banda pa bo por haci locual e ta pidi, pero den obediencia mi a bisa mi a ta bay”, el a conta.

Sr. Lacle ta sigui splica cu el a cuminsa bay San Nicolas pasobra San Nicolas, durante e ultimo añanan tabata e luga unda cue tabata sali tur anochi. El a cuminsa bay dos biaha pa siman cu pan y boter di awa y e ta conta cu na cuminsamento e tabata topa un, dos te cu tres hende maximo y esey tabata dune hopi frustracion cu e tabata tin e intencion di hasta give up.

Na caminda pa bay back cas mi tabata papia cu Dios y mi tabata bise cu mi a tuma mi tempo y mi a resta cuminda y e ora ey el a bisami, Francis bo ta corda ora abo tabata perdi y mi a laga tur cos un banda pa mi bin salababo? Eynan mi kibra, mi a yora y mi bisa okay, mi no ta bay contra Dios mas y asina mi a sigui.

Despues di algun tempo Sr. Lacle a cuminsa ripara cu e grupo cu e tabata topa tabata birando mas grandi y despues di un luna el a cuminsa bay playa tambe. Segun e ta splica e tabata bay San Nicolas, un tiki den village, den e hanchinan y rond di e hanchinan prome y despues tabata bay Playa banda di Hotel Central y den Rancho.

Asina poco poco el a mira e señal y a dicidi di cuminsa traha pa habri Lean On Me Aruba Foundation. Pa haya fondo Sr. Lacle a cuminsa bende cuminda y e tabata tin amigonan cu tabata yudele tambe y na luna di mei 2021 Lean On Me Aruba Foundation a keda funda.

E idea pa e proyecto “Shower on Wheels” a nace pasobra Sr. Lacle a ripara ora cu e tabata yuda e adictonan na San Nicolas y Playa cu hopi no tin e oportunidad pa baña manera debe ser. Nan ta baña cu awa di airco of cu e awa di e fonteinnan cu tin na e plazanan, y esey a dunele e insparacion pa cuminsa cu e royecto nobo aki.

“Mi a cuminsa bay serca hende wak ken por yudami, trahe, welder e etcetera, te cu mi a yega na Tuyo Maduro y su yiu, mi a splike kico mi kier mi vision y el a pone ariba papel. Cu e idea mi a bay CEDE Aruba y mi a haci peticion pa mi haya financiemento y nan tabata hopi interesa y nan a haye un bon idea y despues di vakantie el a wordo aproba”, el a bisa.

Mesora Sr. Lacle a mi a cuminsa traha ariba e trailer. E ta splica cu el a haya un tanki di awa for di WEB y el haya un cabina regalo y e cabina a wordo remodela, nan saca e WC afo, pinte, pone e tank di awaariba e trailer, pone lus ariba e trailer tambe, un amigo a yudele modifika e cabina pa un shower y asina nan a lansa proyecto “Shower on Wheels”.

“E adictonan no a dicidi pa bira adicto. Hopi di nan tin un storia, un trauma, un dolor, un perdida y e anestesia di adiccion ta yudanan lubida y e ta un fase cu bo ta pasate ora cu bo ta ariba caya y tur hende a lagabo los, tur hende a give up ariba bo y tin ora abo mes ta give upriba bo mes. Mi ta papia esey di experiencia, y e proyecto “Shower on Wheels” ta un manera pa yudanan. E proyecto “Shower on Wheels” ta nobo, e ta unico, unda cu mi bay cua bario cu ta mi ta hak na mi auto, e tin su tanki di awa y e ta yega unda cu mi mester ta, esey ta nobo di dje”, el a agrega.

Pa Sr. Lacle tur e ayudonan cu su fundacion ta brinda na e adictonan di Aruba ta un medio, un herment pa e topa cu e adictonan papia cu nan y guianan. “Mi tin contacto cu otro organisacionnan di ayudo, y e meta ta pa mi por papia cu nan, guia nan y si nan ta asina leu pa nan bay busca ayudo. Mi no ta hacie pa mi keda djis te eynan, e ta un manera a mi por topa nan, conta mi testimonio di kico ta posibel y cu Dios nada no ta imposibel”, el a bisa.

“Esey ta e meta eigenlijk di e shower, e pan, e cuminda cayente, e yoghurt, eseynan ta secundario pa mi, pa nan e ta nanpan di cada dia, pero lo mas importante ta pa mi laga nan sa cu pa medio di Dios nada no ta imposibel. Pesey cada biaha mi ta keda papia cu nan, conseha nan y ta yega un momento cu nan lo tuma un decision e ora”.

Aworaki Sr. Lacle ta spera cu e por traha hunto cu e diferente instancianan cu tin eyfo yudando adictonan tambe. Segun el a indica Lean On Me Aruba Foundation tey pa traha hunto, uni forsa pa yuda e adictonan. E ta enfatisa cu e ta un problema di famia, e ta un problema negoshantenan y e ta un problema di gobierno di Aruba tambe. “Hunto nos tin cu wak kico nos por haci pa trece un programa, un speransa pa nan”.

E siguiente paso den e proyectonan cu Sr. Lacle kier cuminsa pronto cune ta pa e tin un lugana San Nicolas y un luga na Playa tambe un cu e por tin un paar di ora pa dia cu e adictonan por bin haya koffie, cuminda y refresca nan mes y asina nan por sinta unrato, combersa pasobra pa Sr. Lacle esey ta e momentonan cu por haci un diferencia.