A pesar di e pandemia di coronavirus, fabricantenan di arma a descende ayera riba un centro di convencion na Abu Dhabi, e capital di Emirato Arabe Uni (UAE pa su siglanan na Ingles) su speransa di cera acuerdo cu militarnan den Medio Oriente.
UAE a revela $1.36 biyon den acuerdonan di arma local y stranhero pa suministra nan forsanan cu tur cos, desde dronennan Sur Africano te artilleria Serbio. Maske e cifra ta surpasa e anuncio di e show di apertura na 2019, expertonan di defensa ta anticipa un reduccion den gasto militar e aña aki, mientras e pandemia y e caida di prijs global di petroleo ta primi presupuestonan den Golfo Persa.
E feria comercial bienial, e Exhibicion y Conferencia Internacional di Defensa ta e prome evento presencial mayor na Abu Dhabi desde e brote di e virus – un señal di su significancia pa e sheikh rico den petroleo cu a mantene restriccionnan di movimento den lunanan recien. Zoom no lo tabata suficiente pa e 70mil presente y 900 exhibitor cu ta depende riba e exposicion di arma di mas grandi den Medio Oriente pa scout clientenan potencial y promociona nan productonan mas recien, desde vehiculonan arma te misilnan balistico.
Oficialnan top Emirati, incluyendo e poderoso prins heredero, Mohammed bin Zayed Al Nahyan, tabata presente, canando memey di e despliegue di rifle, racket y bom.
Pero cu hand sanitizer mesun visibel cu desplieguenan di drone, efectonan di e pandemia a keda visibel. Paviljoennan nacional significante tabata ausente, incluyendo Merca, e exportador di arma mas grandi di mundo.
Companianan grandi Mericano tabata presente pero cu un perfil abao. Representantenan di Lockheed Martin para banda di modelonan di avionnan stealth F-35 fighter tabata keto memey di e revision di administracion di Biden di varios benta di arma den exterior bao ex-presidente Donald ATrump, incluyendo un transferencia masivo di e F-35 na UAE.
Restriccionnan di Covid na Israel tambe a preveni cu e pais a join e exposicion, cu lo tabata e prome biaha despues cu a normalisa relacion cu UAE aña pasa. Un tecnico na e botth di Industria Aeroespacial Israeli a pasa un porcion grandi di e atardi rechasando potencial clientenan.
Pero cantidad di otro pais si tabata presenta, resaltando con hopi a reforsa nan exportacion di arma den e region. Un fluho di arma den Medio Oriente a aumenta cu 61 porciento den ultimo cinco aña, segun reportenan recien di Stockholm International Peace Research Institute, memey di conflicto na Libia, Siria y Yemen.
China, cu ta conta cu e segundo industria di fabricacion di arma mas grandi di mundo, a seduci cu un misil balisto di tamaño real yama ‘Fire Dragon’. Na e estatal Norinco, business manager Luo Haopeng a remarca cu China a aumenta su espacio na e luga e aña aki. Ademas di sirbi forsanan terestre Emirati, el a nenga di elabora riba e ambicion di su compania den Medio Oriente, unda China ya a bende drone arma na Irak, UAE y Saudi Arabia.
“E sorto di ekipo aki no ta manera cuminda of paña”, el a bisa, gesticulando na e despliegue gigante di misil. “Tur ta relaciona na politica.”
Na e paviljoen Ruso, lider regional Checheno, Ramzan Kadyrov a inspecciona un cantidad amplio di Kalashnikovs. Cerca, e Grupo WB di Polonia a mustra videonan di benta di su ‘drone suicida’, lansando su mes di gran haltura pa explota riba vehiculonan arma. Azerbaijan a mustra interes den e sistema durante su conflico na frontera cu Armenia aña pasa, segun director di comunicacion Marta Lazewska a bisa, na momento cu drone Turco a yuda bolter e asunto na su fabor.
Na e paviljoen pa Saudi Arabia, e importador di arma mas grandi di mundo durante ultimo cinco aña, oficialnan tabata purbando di promove e reino como un gigante di defensa emergiendo bao e asina-yama Vision 2030. E programa, pusha pa e poderoso prins heredero Mohammed bin Salman, tin meta pa kibra e adiccion di importacion di e pais, diversifica su economia leu di petroleo, y localisa mas di mita di su gastonan militar.
A pesar di su radar y bateria di misil US Patriot, Saudi Arabia cada bes mas ta den riesgo di atake na frontera di e rebeldenan Houthi na Yemen, cu sosten di Iran, cu e luna aki a lansa dronennan carga cu bom cu a dal den un avion bashi na aeropuerto Abha na e pais. Un coalicion militar lidera pa e Saudinan ta den guera cu e Houthis desde 2015, despues cu e rebeldenan a saca e gobierno, sosteni pa Saudi Arabia, for di e capital. E conflicto a crea loke Nacionnan Uni a yama e pio crisis humanitario di mundo.
