Shortcutz Aruba lo cuminsa e di dos edicion diadomingo awor na Ateliers’89. Den un reciente entrevista cu Juan Francisco Pardo, el a splica nos tocante Shortcutz Aruba.

Segun sr. Pardo, el a realisa cu hobennan ta haci film, pero Shortcutz a nace pa forma un plataforma cu ta haci shortfilm cada siman. Na cuminsamento, e ta splica, nan a froma e asina yama Rooftop film club. Dado momento a uni e dosnan aki hunto pero despues a cera Rooftop ya cu el a keda ‘sin roof’ pa motibo cu e academia (Rietveld) a cera.

El a bisa cu Aruba ta e unico Isla cu ta organisa Shortcutz. “Tur hende conoce Aruba pa Aruba”, e ta bisa. Esaki ta pa motibo cu otro paisnan, ta ciudadnan ta participa manera Amsterdam, Berlin, London, Hong Kong, Rio de Janeiro, Brasilia y na varios ciudad di Portugal. Den nan, Aruba ta e unico Isla den Caribe participando.

Sr. Pardo ta bisa cu e plataforma mes ta purbando di wak con ta cuminsa drenta Merca. “E creador a bin como plataforma Internacional cu ta mustra filmnan y haci competencia. Un Shortfiln di network di Amsterdam lo por ser mustra den un seccion di Shortcutz Aruba.

Tin na Aruba shortfilms cu ta competi.” Sinembargo sr. Pardo ta bisa cu na Aruba hende no ta haci shortfilm manera rond di mundo. “Aruba ta limita, no ta cada siman hende ta haci un shortfilm. Pa motibo ey a scoge un bes pa luna paso normalmente e ta un bes pa siman.”

Segun sr. Pardo tur pais ta intercambia peliculanan cortico, esey ta haci cu peliculanan cortico di Aruba tambe por yega na un publico mas amplio. Dentro di poco talentonan local por yega na un publico mas grandi ora cu paisnan manera Inglatera, Angola y China start cu nan Shortcutz. Sigur esaki ta un oportunidad pa talentonan local showcase nan pelicula y Aruba na mundo henter.

El a bisa tambe cu a agrega un categoria nobo cu ta videoclip. “E categoria a bira mas amplio tambe. Por haci narativo, video art, accion, documentario, experimental anto tin tambe mas categoria; tur esey por cay bou di Shortcutz.” Despues el a agrega cu hasta un poesia por. Segun sr. Pardo nan kier duna oportunidad na tur hende cu lo kier haci algo creativo, por haya e e chens door di hacie bou Shortcutz. Di e forma aki nan por showcase locual nan a haci.

Duracion di peliculanan cortico por ta di 1 te cu 30 minuut. Segun sr. Pardo no ta bay puntra pa calidad, pa motibo cu ta limita e chens. Nan lo laga tur hende participa y lo tin premio publico y premio di hurado pa e peliculanan outstanding shortfilm anto outstanding music video.

“Nos ta bay invita producers, directors pa conta di nan film. Nos ta bay pone hunto cu un movie internacional, pa motibo cu no tin film local. Asina tin un programa completo”, e di. Durante e evento diadomingo awo -segun sr. Pardo- publico lo por gosa di e peliculanan di Shortcutz Aruba edicion uno. Pa esnan cu no a logra wak e peliculanan di Shortcutz Aruba edicion uno por finalmente waknan, tur tras di otro.

Tambe e personanan cu ya caba a mira e peliculanan aki caba por disfruta di nan un biaha mas. E obhetivo ta pa resumi Shortcutz Aruba 2017 prome cu start cu Shortcutz Aruba 2018. Ademas di peliculanan cortico tambe lo tin musica den man di DJ Adriano Nanof y DJ Tech, sesionnan di bahada di solo. E evento ta inicia 6’or di atardi na Ateliers ’89 cu ta situa na Dominicanessenstraat 34.