Shoconan ta confrontando temponan dificil y mester di fondonan pa proyecto di preservacion

Mediante un comunicado, Aruba Birdlife Conservation ta informa cu na e momentonan aki tin un necesidad di fondonan pa por continua pone neishinan artificial y asina sigui preserva e Shoconan.

Den ultimo añanan, Shoconan ta bin enfrentando desafionan cada biaha mas grandi na luganan di reproduccion sigur y adecua na varios area di e isla.

Tera Cora, e zona patras di campo di golf di Tierra del Sol, algun biaha tabata un zona di biodiversidad halto y tambe tabata un di e luganan di reproduccion mas importante pa Burrowing Owl (Athene cunicularia arubensis) localmente yama “Shoco.”

Na 2019, pa mehora e posibilidadnan di sobrevivencia di e Shoco, a instala e 20 prome neishi artificial na e campo di golf na Tierra del Sol. E motibo principal ta pa brinda na e Shoconan e oportunidadnan di reproduccion alternativo debi na e destruccion sistematico di nan neishi natural na Tera Cora, pa via di uso no regula di actividadnan di UTV y ATV.

Mas di 90% di nan neishi natural na Tera Cora a ser destrui den algun aña, despues di

introduccion di turismo di aventura y te e fecha hopi Shoco ta muri pa e coremento imprudente di autonan todo tereno. Ta conoci cu tanto na nivel internacional como local, turismo insostenibel di Aruba, incluyendo e asina yama turismo di “aventura” a yega na un costo hopi halto pa medio ambiente y biodiversidad di e isla.

Awor, despues di cinco aña, nan ta contento di informa cu e buraconan aki ta haciendo un diferencia y ta yudando na mehora e oportunidad di sobrevivencia di e Shoconan.

Te cu awor, nan a logra pone mas cu 60 buraco artificial. Nan meta ta pa alcansa 500 den e proximo añanan, poniendo nan rond di e isla na luganan sigur pa duna na e ​​Shoconan un oportunidad alternativo pa haci neishi.

Pa logra e meta aki nan mester di fondo y acercando na e ultimo kwartaal di 2024, nan lo ta gradici si companianan, organisacionnan, clubnan y otro por considera inclui e Proyecto di Conservacion di Shoco den nan lista di donacion. Pa nan cada contribucion ta haci un diferencia.

Na cuminsamento di e aña aki, a inicia discusionnan cu e doñonan nobo di e cancha di golf pa loke ta trata e proyecto di conservacion di Shoco existente. E doñonan nobo, e grupo Iberostar, a bay di acuerdo pa sigui sostene e proyecto y ta compromete na hib’e un stap mas leu.

Mantencion lo ta realisa riba e neishi artificial existente segun cu e cancha di golf ta pasa den renobacion y mehoracion, y 12 neishi artificial nobo lo ser agrega na luganan sigur rond di e cancha di golf aumentando e cantidad total na 32.

E proyecto specifico di conservacion di Shoco aki, dirigi pa Aruba Birdlife Conservation, lo ta integra den e diseño y marca nobo di e cancha di golf, treciendo un componente educativo como parti di e experencia general pa e golfistanan.

Informacion tocante e proyecto di conservacion di Shoco lo ta disponibel na e pro shop y riba medionan social, yudando pa conscientisa e bishitantenan, golfistanan local, y personal, cu lo ser entrena pa contesta e hopi pregunta cu bishitantenan hopi biaha tin.

E iniciativa aki ta engrandece e experiencia general di golf di Aruba pa bishitantenan y localnan mientras ta duna na e Burrowing Owl den peliger di extension un miho chens di sobrevivi.

E organisacion no gubernamental (NGO) Aruba Birdlife Conservation (ABC) Foundation regularmente tambe ta trece dilanti nan preocupacionnan pa loke ta trata proteccion di medio ambiente, como tambe casonan unda naturalesa y animalnan cu ta sali perhudica.

Na juli ultimo Bon Dia Aruba a publica cu riba nan pagina di Facebook ABC tabata lamenta e daño cu algun shoco ta sufri.

E fundacion a indica e luna di juni e shoconan a encontra diferente dificultad, tres a muri di veneno, un a muri durante mantenemento di caya y dos a ser golpia pa vehiculo. E NGO ta remarca cu esaki ta solamente e casonan cu nan ta na altura di dje y cu pues e cifra di mortalidad ta probablemente mas halto pasobra no tur caso ta ser comparti cu nan.

“Nos ta contento ora nos por yuda esnan cu a sobrevivi pa bolbe na e bida silvestre di parha di Aruba. Pero, algun caso ta rekeri tratamento intensivo, algo cu por tuma mas di un aña prome cu un shoco por ser libera of parcialmente libera back den naturalesa. Ta rekeri conocemento specialisa y gran dedicacion pa yega na e punto di debolbe un Shoco na su habitat natural,” ABC a resalta.

E potretnan cu nan a publica na juli tabata ilustra un shoco cu claramente a perde bista di un banda di wowo y otro shoco cu tabata parce cu el a perde bista parcialmente di e otro wowo.

ABC ta splica cu e shoconan mester di nan bista pa nan por busca nan cuminda. Si nan por logra esaki exitosamente nan por mantene nan neishi di shoconan baby di e miho manera posible. Pero ora nan bista ta parcialmente perhudica, e ta rekeri di mas esfuerso di e shoco pa e por cuida su mes y su famia.

E fundacion ta duna algun tips y manera con hende por yuda pa evita cu e shoconan ta sufri accidentenan cu ta prevenible.

Ta importante pa chauffeurnan core cu mas cautela na momento cu nan ta cerca di un neishi di shoco of ora cu nan wak uni cerca. Tambe ora cu haci “off-road” cu ATV of UTV, mester sigura cu e vehiculonan aki ta keda riba e caminda indica ya cu neishinan di shoco no ta facil pa wak y ta mas facil pa perhudica of destrui un neishi.