(AP) — E locura recien den bolsa di balor riba un token digital yama Shiba Inu – comunmente considera un ‘meme’ of moneda joke – a lansa e criptomoneda cu tema di cacho den e top dies activo digital mas valioso pa balor di mercado, alcansando $40 biyon y surpasando su primo y aparente inspiracion, Dogecoin.
Shiba a aumenta otro 10 porciento pa merdia ayera y a duplica den balor durante ultimo siman. Mayoria di e ganashi aki a bin den un cantidad di intercambio diaranson ultimo, unda a gana un abrumante 66 porciento.
Hasta cu su crecemento meteorico recien – ta alrededor di 900 porciento ariba den ultimo luna – cada moneda Shiba ta costa apenas un fraccion minusculo di un cen di dollar. Si bo cumpra mil dollar di Shiba na fin di september, bo 20 miyon moneda awor lo tin balor di alrededor di 9mil dollar.
Manera mayoria di criptomoneda, Shiba no ta usa comunmente pa transaccionnan comercial y ta considera pa mayoria di experto y inversionistanan como un bet speculativo di riesgo halto pa motibo di e volatilidad amplio di e mercado cripto. Expertonan ta adverti cu inversionistanan mester ta cauteloso tocante pone placa den algo cu liderazgo anonimo cu ta parce di tin tiki uso funcional.
Lee Reiners, un skeptico vocal di cripto, ta duna les di tecnologia financiero y criptomoneda na facultad di ley na Universidad Duke. El a bisa cu e no ta sorprendi pa e aumento recien di Shiba. “Esaki ta loke ta pasa ora bo tin speculacion masivo den activonan cu no tin balor intrinsico”, Reiners a bisa.
Inversionistanan por pensa cu e storia aki ta zona familiar. Bitcoin a duplica den balor dos biaha e aña aki – cu un caida rapido entre nan – y awo ta bende pa mas cu $60mil pa cada moneda.
Entre accionnan, GameStop tabatin un aumento similar na Shiba, creciendo di alrededor di $17 pa accion na inicio di januari na $483 despues den e mesun luna. Recientemente e ta intercambia na alrededor di $180.
Mientras Shiba ta e moneda popular actualmente, no por intercambia esaki mediante brokernan tradicional – ainda. Un peticion cu mas di 450mil firma riba Change.org ta pushando pa e app mobil di intercambio, Robinhood cuminsa permiti intercambio di Shiba. Robinhood actualmente ta permiti intercambio di Dogecoin y otro criptomoneda. Su CEO, Vladimir Tenev a bisa inversionistanan siman pasa cu e compania ‘cuidadosamente ta bay evalua si nos por agrega monedanan nobo di un manera cu ta safe pa clientenan y den linea cu rekisitonan regulatorio’.
Regulacion mas fuerte di mercadonan cripto ta parce inevitable, pero no ta cla na ki momento esaki ta bay sucede. Presidente di US Securities and Exchange Commission, Gary Gensler a bisa na augustus cu e mundo di cripto no tin suficiente proteccion pa inversionista, y a compar’e cu e ‘Wild West’.
Si falta di regulacion ta impulsando aumentonan recien den Shiba y otro activonan digital ainda no ta cla. Loke ta parce aparente sinembargo ta cu inversionistanan minoritario – esnan chikito – ta liderando e caminda.
Kyle Waters, analista investigativo na compania di analitica y data di blockchain Coin Metrics, a bisa cu e tamaño mediano di intercambio di Shiba riba e diaranson druk ey tabata $115. Esey ta ‘altamente sugestivo’ cu e comerciante tipico di Shiba riba Coinbase ta un minorista chikito, Waters a bisa.
Ascenso di Shiba ta similar na esun di Dogecoin den spring, tempo cu el a bira popular y a bula di alrededor di 5 cen na 57 cen entre dia 7 di april y 7 di mei.
Manera otro cryptomonedanan, Shiba ta lora den misterio. Segun su shite paper – of ‘Woof Paper’ den e caso aki – un persona of grupo anonimo, yama Ryoshi, a cuminsa e token na 2020. E documento, cu ta describi con Shiba y su progenio ta traha, tambe ta yen di platitudnan vago tocante comunidad, libertad, revolucion y destruccion di paradigmanan tradicional. Un persona cu conocemento limita di vocabulario di tecnologia y blockchain lo haya dificil pa descifra mayoria di e palabranan tecnico den e white paper.
