Fundacion pa Hende Muhe den Dificultad mester a nenga algun persona (casi dies caso) den e ultimo lunanan cu ta acudi cerca nan pa opvang den nan shelter. Esaki Maria Carasquilla trahado social na e fundacion ta bisa Bon Dia Aruba.
“Nos no tin luga. Actualmente nos cas di refugio ta yen y nos no tin luga pa pone e hendenan aki”, sra. Carasquilla ta bisa Bon Dia. Esaki ta un preocupacion cu e fundacion ta sinta cu ne pasobra nan no por yuda tur hende ni mas cu nan kier.
Problema principal: placa
E fundacion ta bisa cu nan por pensa tanto idea pero e problema principal ta keda e falta di fondo. Na Aruba no tin otro luga pa dirigi e hendenan aki cu ta bin cu problemanan (keho di maltrato severo etc.). Mester tene na cuenta cu e siguridad ta hunga un rol hopi importante pasobra cu e fundacion tin hende pa yuda nan pa tene un hende pa un of dos dia. Pero si mester mira e grado di insiguridad y diferencia di e casonan, nan no por djis bay keda cerca cualkier persona pa e ora expone e persona eynan tampoco, segun Magaly Maduro coordinador di e fundacion ta splica. Pues mester di un luga pa nan cu ta brinda e siguridad tanto pa e cliente cu e trahadonan di e fundacion.
No tin caminda di bay
Tambe tin hende cu problema di adiccion pisa cu e fundacion mester nenga opvang pasobra cu nan personal no ta ekipa pa atende nan. Hendenan lamentablemente cu problemanan psikiatrico cu no ta fit den e meta di e shelter aki, tampoco nan por tuma.
E clientenan aki mester henter un otro guia y ayudo cual nan tampoco por yuda cu ne. “Nos no tin un psikiatra den cas pa trata cu un persona cu mester e tipo di ayudo aki. Nos ta keda preocupa pasobra kico e ora e hendenan aki ta bay haci?,” sra. Carasquilla ta bisa.
Nan ta meld na otro instancianan cu por yuda den e caso y purba di yuda e clientenan guia. Hopi di nan ta djis keda den e mesun situacion y si por tin un otro luga of mas caminda pa cana, e situacion lo ta otro segun e fundacion. Sra. Carasquilla: “Nos tabata tratando un caso caminda ta pega na Sociale Zaken pasobra nan ta pidi nos ayudo pero nan tampoco tin luga pa hiba e hendenan aki. Pues nos ta pega eynan.”
