Sheila Lazo-Tromp: Nos a scoge pa duna un regalo special riba Dia di Enseñansa na dos miembro di SIMAR

Ayera tabata Dia di Enseñansa y pa cu esaki e directiva di SIMAR a haci entrega di donacion na dos scol. Tambe nan a treat e dos scol aki. Miembronan di directiva Sra. Sra. Sheila Lazo-Tromp, president di e sindicato, Sra. Maroeschka Cornelie, secretaria, y Natalie Carlo tabata presente pa haci entrega na e scolnan. St. Aloysius y Fontein Kleuterschool pa a duna un regalo special pero tambe dos miembro.

Pa hopi tempo caba SIMAR ta bringa pa proclama e dia di ayera pa ta Dia di Enseñansa, segun Sra. Lazo-Tromp. “Nos a bin cu e idea nobo pa scoge dos scol. Nos a scoge un scol basico y un kleuterschool pa nos bin haci un regalo special specialmente na e muchanan, pasobra nan ta esunnan cu ta forma nos enseñansa,” el a indica.

Reconoce miembro di sindicato

Pero tambe como sindicato, nan kier a reconoce nan miembronan y nan a scoge pa duna juffrouw Nanouk di St. Aloysius y meneer Gino, cabesante di Fontein Kleuterschool un reconocimento pa nan trabou den enseñansa. E juffrouw y cabesante di scol a haya un regalo special, pero tambe SIMAR a duna e dos scol aki un regalo special. Tur e muchanan a ricibi un fruta for di e sindicato. SIMAR tin diferente miembro, juffrouw Nanouk y meneer Gino ta e unico docentenan di e scolnan aki cu ta forma parti di e sindicato, segun SIMAR.

47 aña di existencia

Aparte cu ayera tabata Dia di Enseñansa, SIMAR a celebra su di 47 aña di existencia. Segun Sra. Lazo-Tromp, pa nan esaki ta significa hopi. “Si bo wak e cambionan cu tabata tin, si bo wak e posicion di e hende muhe den enseñansa con e ta awendia pero sigur nos tin hopi mas pa bay,” Sra. Lazo-Tromp a bisa.

Pa loke tabata cu e celebracion pa e Dia di Enseñansa, esaki no a keda te na duna e regalonan special na e dos scol aki. E directiva di SIMAR tambe a scoge pa haci algo cu e miembronan, pero esaki lo wordo haci riba Dia di Maestro, segun e sindicalista. Nan a scoge e dia aki pa duna un tiki mas atencion na e maestronan. Loke nan a haci ayera tabata duna atencion na e scolnan y e muchanan cu ta forma parti di enseñansa.