Sheila Lazo-Tromp: Managernan di EPI ta den welga y scol no lo cuminsa

Sindicato SIMAR hunto cu e managernan di EPI y abogado Jose Figaroa a yega hunto na sede di e sindicato, pa un welga cu a cuminsa ayera, segun Sra. Sheila Lazo-Tromp, president di SIMAR. Cu esaki scol no lo cuminsa otro siman pa e studiantenan di EPI.

Sindicato SIMAR tin hopi tempo ta canando cu e caso di e managernan di EPI. Hopi carta a wordo manda pa minister. A sinta algun biaha cu minister y ainda nan no por sali for di e impasse aki, segun e president di sindicato.

Dicidi di pone trabou abou

Ayera como tabata e prome dia di trabou, sindicato y managernan di EPI a dicidi di cu ta pone trabou abou. “Nos no ta bay acepta pa drenta un aña escolar atrobe den e mesun condicion cu esaki a bay un biaha caba. Nos tin diferente punto cu nos a manda na minister, cu nos no a haya un contesta positivo,” segun Sra. Lazo-Tromp. Ultimo nan a bolbe haya un carta cu ta simplemente bisa bek loke semper nan tabata sa, cu no ta nada nobo, nada concreto. Ainda e managernan ta den un situacion cu ainda pa nan no ta sigur kico ta bay pasa na scol, kico ta bay pasa cu nan trabou y kico ta bay pasa cu nan mesun posicion. Esaki ta algo cu e sindicato no por acepta mas.

Puntonan

A cuminsa cu tres punto, pero awo a bin acerca 5 punto mas. E tres puntonan cu a manda pidi minister ta pa regla periodiek, toelage pa nan y compensacion. Tambe cu tin e parti di organogram, di cual cu mester traha riba dje. Minister a priminti cuminsa riba dje na december, pero despues a bay na februari.

A puntra Sra. Lazo-Tromp dicon no a atende cu e asunto aki prome y durante vakantie. El a indica cu prome cu vakantie y durante vakantie, e sindicato tabata atende e problema cu e managernan ta pasando den dje. “Semper como docente, bo tin bo curason pa enseñansa, bo ta pensa riba e muchanan y bo no kier perhudica nan. Y esaki ta bay riba costo di bo mes y bo mesun salud. Y awor akinan nos a bisa cu nos no por sigui asina mas. Nos kier un contesta, nos kier cosnan concreto, pa por start e aña escolar nobo.”

Tur loke mester wordo entrega, tur loke mester tin cla na comienso di aña escolar, loke ta e planificacion, loke ta rooster, loke ta docentenan, tur e parti organisatorio, nan no ta bay cumpli cun’e. Asina cu minister cu cumpli cu su banda, e aña escolar por cuminsa. Awo nan ta sinta cu e problema, pasobra e problema ta keda pa nan. Asina aki nan a dicidi cu diaranson ta cuminsa cu e accion. No ta bay entrega rooster, no ta bay entrega e planificacion, no ta bay pone scol cla pa start, te ora cu tin claridad. Nan a percura pa avisa minister riba e asunto aki, segun e sindicalista. A bisa minister cu kier un claridad, pasobra sino no ta bay drenta un aña escolar nobo y no a haya esaki. E deadline a yega y no a haya un contesta riba esaki. Riba esaki, e managernan a pone cabes hunto. Sindicato ta compronde e consecuencia di e decision aki, pero, un rato bo tin cu para riba bo mes tambe, pasobra bo no por keda traha den un situacion asina aki.