Shawndré Joshua Hans Geerman ta un cara masha conoci na Aruba. Shawndré a nace dia 20 di Juni 2003 y a wordo diagnostica cu ‘Down Syndrome’. Specificamente ‘trimosome 21’ cual ta 3 biaha chromosome numero 21. Shawndré a nace cu 3 buraco den su curason y mester a bai opera na Houston Texas, pero pa medio di orashon y fe e ‘buraconan a sera’, cual no tabata necesario mas pa opera.

Apesar di su limitacion Shawndré no a para keto y a bishita diferente skol na Aruba manera Cresh ABC Peuter School, Skol Dunuman for di 6 te cu 16 aña y Muchila Creativo for di 2019, un School cu realmente a demostra di tin hobennan ‘Special’ na nan curason cu maestranan cu ta traha cu amor. Akinan nan ta haya tur lesnan cu nan tin mester pa judanan desaroya. Nan ta haya loke nan tin mester extra for di Enseñansa pa Empleo, y nan ta Loop stage tambe pa practica loke nan a siña. Recientemente el la haya su Certificado di Enseñansa Pa Empleo pa e curso di Basic Table Protocol & Etiquette F & B

No tabata facil pa logra pa Shawndré wordo accepta den lesnan entre otro les di Tennis pa por a jude cu su motoriek. Na 2013 e unico instructor cu a dicidi di tuma e challenge pa duna Shawndré les tabata Meneer Eddy Ras (qpd). Desde e tempo ey por a ripara cu tur otro portanan a cuminsa habri. Di eynan e la sigi les di modelahe, baile, drum y como un teenager preocupa pa su curpa hasta ta bai gym.

Shawndré a logra masha hopi cos manera; Aparace riba e Big Screen di Time Square na New York na 2 diferente occasion, 2020 y 2021. Modela den e show international na Denver Colorado, “Be Beautiful Be Yourself”. Hasta saca potret cu artistanan conoci manera Jamie Fox, Matt Dillon y John McGinley. Modela den diferente show na Aruba como tambe Corsow. Participa den diferente videoclip cu diferente banda y toca den show di Drum.

Kiko mi kier bira ora mi bira grandi:

Segun mi ta crese mas y mas mi deseo di mas grandi ta pa sigi ta un bon cuidadano, un bon ehempel y ta e persona cu por haci un diferencia den bida di tur persona cu tin un deficiencia fisico, mental of cu tin cualkier reto pa biba den e mundo di hendenan tipico.

Kiko mi gusta mas di mi mes:

Mi ta un fighter. Unda mi ta awo ta hopi diferente caminda mi tabata. Mi tabata tin hopi miedo di ta den publico paso hende tipico no ta compronde hende special y ta burla di hende ‘Special’. Pero cu apoyo di mi mayornan y nos fe den Dios mi por a surpasa tur obstaculo y jega te unda cu mi ta awor, un deportista, un modelo internacional, un bailado, un drummer y un ehempel pa hobennan cu ta ‘Special’.

Kiko mi ta hasi ora mi ta sinti tristo:

Ora mi ta tristo mi ta scucha alabansa y toca drum, musica ta trese alegria den mi mente y curason.

Ken ta bo miho amiga of amigo y dicon:

Mi mayornan, nan a acceptami y stima mi manera cu mi ta y cu un amor incondishonal. Nan ta orguyoso di mi y nunca a sconde mi for di publico.

Kiko ta bo mensahe na e muchanan di Aruba:

Pa nunca entrega. No permiti hende label bo cu bo ‘No Por’. No permiti hende ‘Limitabo’, bo tin un soño, bo tin un deseo cu bo kier logra den bida, bai pé, lucha duro pa bo logra. Paso tur cos bo por logra ora hende kere den bo y duna bo e oportunidad cu bo merese.q