Durante rueda di prensa di Gobierno di Aruba, Directie Volksgezondheid (DVG) a presenta ultimo desaroyonan cu ta regarda Covid-19. Pa cual a anuncia cu actualmente ta den deliberacion cu Hulanda, pa Aruba por ta bon prepara pa ricibi e vacunanan contra Covid-19, pa final di december/ comienso di januari 2021. Y pa prepara e plan di reparticion di e vacuna.

Pa locual ta e structura di reparticion di e vacuna, mescos cu tempo di influencia ( mas o menos 10 aña pasa ), tin gruponan cu ta haya prome. E gruponan ta como lo siguiente: E prome grupo cu ta bin na remarca ta esunnan cu ta traha den cuido (como cu nan ta e grupo cu kier proteha pa por atende otronan cu lo tin necesidad di cuido).

Despues di e grupo aki, e grupo di 60+ lo bin na remarca y personanan cu malesanan cronico (e grupo vulnerabel). Ademas, ta trahando riba un sistema digital pa esunnan interesa por haci e peticion pa un cita pa di e forma aki evita aglomeracion di hende.

E vacuna no ta obligatorio

Mescos cu otro vacunanan na Aruba, e vacuna contra Covid-19 no ta obligatorio pero e ta wordo conseha si. Na momento cu tin mas informacion tocante e tipo di vacuna lo ricibi lo duna e informacion aki, considerando cu internacionalmente tin diferente vacuna.

Mescos cu ta e caso cu otro vacunanan, esun aki tambe lo tin efecto secundario y esaki ta depende di cu a vacuna ricibi y con e ta wordo aplica. Tambe tin diferente otro deliberacionnan andando tocante e forma di warda e vacuna di acuerdo cu e temperatura cu ta varia cu ta determina con lo distribui’e tambe.

Sigui mantene distanciamento social

Di parti di DVG kier remarca cu a pesar cu diferente medida pa proteccion di nos mes a wordo flexibilisa, kier toch pone hopi atencion pa evita aglomeracion. Ta keda pidi pa haci uzo di tapa boca mas tanto cu ta posibel specialmente ora cu no por tene distancia social. Esey ta keda valido den tur medida cu flexibilisa.

Manera cu por a tuma nota, durante di e ultimo dos pa tres simannan Aruba ta bayendo den bon direccion pa loke ta casonan activo. Pa cual por bisa cu si e casonan keda rond di 10 caso positivo nobo pa dia, e sistema medico por carg’e. Es decir, cu por controla e virus y pasadianan di fiesta trankilo sin familiar den ICU y/of cu caso lamentabel cu un famia por fayece a causa di esaki. Pesey ta keda recorda cada persona pa sigui proteha y mantene na regla di distanciamento.

Mester bisa cu DVG a reuni cu diferente grupo, entre otro esunnan den sector di entretenimento kendenan tambe ta desea pa traha pa nan tin salario, p’esey ta pidi pa cada persona coopera. Paso na momento cu un banda toca y personanan cuminsa baila, lamentablemente esaki por tin consecuencia pa e personanan aki. Tene cuenta cu si bo comportacion no ta bon, bo ta daña pa otro cu tambe ta desea di tin trabou y desea di cobra y cuida nan famia.

Mas virus activo

Prome cu conclui mester recorda tur local cu ora di biahamento e riesgo di contagio por ta un tiki mas grandi. Pues keda uza tapa boca manera cu ta uza na Aruba y mantene distancia social.

Ta consciente cu no ta covid so ta andando, na Aruba mes tin varios caso cu hende tin covid hunto cu un otro virus respiratorio.

E medidanan cu ta tumando pa covid ta valido tambe pa tur otro virus respiratorio, pues si ta a tene na e medidanan institui pa covid, ta cuida bo mes contra otro virus nan tambe. Considerando cu awa a yobe y solo a sali, ta e momento ideal pa Dengue, Zika y Chikungunya, mester tene cuenta pa haci rond di cas limpi pa no tin criadero.

Di e forma aki ta mantene bo mes na reglanan di higiena pa proteha contra tur otro malesa cu ta circulando actualmente.