Diabierna ultimo, durante un conferencia di prensa di Gobierno di Aruba, Sharline Koolman di DVG a splica tocante casonan nobo cu por haya na momento di habri fronteranan bek y si por ta necesario implementa un ‘Lock Down’ nobo.

Na e momentonan aki Aruba no tin mas caso di COVID-19, pero Koolman a afirma cu esey no lo keda asina. Sino cu ta depende mas riba comportamento di hendenan tin awe, na momento cu nan no ta sigur ora cu e frontera lo habri y cu nan sa cu lo importa casonan nobo, no solamente di turista sino cu tambe di ciudadanonan local cu por biaha bin cune. No por enfoca riba casonan di turista so, sino cu tin wak tambe riba e hendenan local.

“Ora cu esey bin bek nos mester ta prepara p’e”, Koolman a enfatisa.

Ta comprendibel cu despues di casi tres luna cu ciudadanonan a keda cera na cas lo kier topa cu nan coleganan. Pero mester mantene e distancia social y distancia fisico. E manera con pa haci esaki na momento cu fronteranan habri bek, Aruba ta prepara pa deal cune.

Tocante esaki, Bon Dia Aruba a puntra Koolman si na momento cu Aruba por haya casonan nobo di COVID-19 lo bolbe cay den ‘Lock Down’. El a contesta cu tin diferente puntonan cu lo mester evalua. “E diferencia ta cu na comienso nos no tabata prepara.” Manera ningun pais tabata prepara, pero aworaki nan a prepara nan mes, nan tin e ekiponan como diferente partinan hinca den otro.

Asina mes, el a pidi pa comunidad practica e parti di distanciamento social y labamento di man, entre otro. Personalnan di compania tambe mester ta comodo cu e protocol cu a wordo traha, e diferencia ta, manera el a menciona caba, cu den comienso nan no tabatin nada di esey y aworaki nan tin tur cos na luga. “No ta asina cu ora nos lo bolbe haya dos of mas caso nos lo bay den lock down, e ta depende di mas punto”, Koolman a manifesta.

Di loke ta trata e ultimo pashent cu a recupera, Koolman a informa cu e no a haya e plasma pa por recupera, pa via di recomendacionnan medico. Tambe el a expresa cu e tabatin contacto cu Dr. Choudhry pa loke ta trata e tratamento di plasma, y di esaki el a haya informacion cu nan tin diferente plasma warda cu tambe ta forma parti di preparacion di hospital. Nan ta bezig haciendo esaki pa momento cu nan ta bay mester di dje, si Aruba ta haya casonan nobo, nan por ta bon prepara.

Di testnan di anticuerpo, Koolman a declara cu siman pasa el a haya un rapport di Hulanda pa cu esaki y tin diferente punto cu mester tene na cuenta cune. Na momento cu un persona ta bay haci un test di anticuerpo – cu aworaki Hulanda ta bezig cu su evaluacion – mester tene na cuenta cu si e haci un test di e tipo aki den un hospital cu tin hopi caso activo, e test ta mas confiabel. Esaki pa motibo cu nan sa ki dia e persona a bira malo, nan tin informacion di cuanto dianan malo e persona tin y si ta sali positivo na e momento ey, ya sa cu e persona ta cumpli cu tur e detayenan.

Na e momento cu ta haci un test pa un grupo di hende cu no tin informacion di nan, probablemente algun persona no a haya sintoma y na momento cu ta cuminsa haci test por duna falso-positivo of falso-negativo y no por haci nada cu e resultadonan ey. Fuera di esey tin hopi test disponibel cu e sensibilidad di tur e testnan aki cu no ta confiabel tampoco, loke ta nifica cu si mester haci un investigacion serologico pa wak cuanto hende a haya e malesa aki, por haya hopi duda riba dje. El a comenta cu e testnan aki te ainda no ta confiabel pa haci bou un poblacion, sino solamente hunto cu un diagnostico di un hospital.