Sharlene Koolman di DVG tocante cambio di tabel di Covid-19; Kier bin cu panel mas amplio pa ta mas transparente

Dialuna ultimo, DVG a publica un cambio den e tabel di cifranan tocante Covid-19, na unda prome tabata specifica informacion di turistanan. Un cambio cu a causa un confusion den e cifranan tocante transmision local y casonan importa.

Pa cu esaki, Sharlene Koolman di DVG den un conferencia di prensa a expresa pa Bon Dia Aruba cu loke nan kier ta pa bin cu un panel di informacion un tiki mas amplio, pa asina ta mas transparente posibel. El a sigura cu nan a ripara cu esey a causa un ‘tiki panico’ den comunidad di Aruba cu a kere cu tabatin dos caso nobo positivo di Covid-19.

Pa evita esey, Koolman a expresa cu nan a bin cu e informacion aki, pero nan a splica esey prome pa tur hende por compronde kico esey ta nifica y haci algun ahustacion manera cu el a wordo presenta. Asina na momento cu lo manda e informacion na nivel internacional, hende por compronde mas facil kico ta nifica.

“Absolutamente nos no a bin cu e idea pa no duna informacion, sino cu ta miho, pasobra nos kier clarifica y haci esaki un tiki mas comprendibel.”

Ademas el a señala cu fin di siman ultimo tabata uno basta activo. El a menciona cu den cierto momento na aeropuerto tabatin cierto turista wardando den rij. “Nos mester compronde cu esey ta e maneho cu nos tin y na e momento cu bo no por mantene distancia social, bo ta usa e mondmask”, loke a sucede, segun el a sigura.

Di esaki, el a trece dilanti cu comunidad no mester tin motibo pa tin panico na momento cu un persona por ta para den un rij, por ehemplo, na aeropuerto. Mester percura pa tene distancia uno cu otro, si esey no por ta posibel, e personanan mester usa su mondmask hunto cu hand sanitizer y asina por controla di e forma aki.

P’esey den e maneho di protocolnan di aeropuerto y esun cu nan a aproba, Koolman a comenta cu e persona of turista cu ta haci uso di avion pa yega na Aruba, na momento cu subi avion mester bisti su mondmask, y ta te cu e ta yega na su destinacion e por deshaci di e mondmask.

Di e parti di cuarentena, Koolman a bisa cu taskforce ta controla y tur caso ta bay wordo yama y bishita. Si un persona local of turista no a haci e prueba na momento di yega na Aruba y no kier haci e prueba na aeropuerto, e momento cu e lo dicidi pa bay den cuarentena 14 dia, e taskforce lo bay controla. Si e ta dicidi pa haci e prueba despues cu a bay cuarentena, e costo di e prueba ta cay bou su persona y no pa AZV.