Te asina leu tin varios cambio ta sosodiendo den Censo, como tambe tumamento di personal nobo e departamento. Algun di e cambionan ta cu no ta necesario mas pa pasa na warda di polis pa meld cu un paspoort a wordo perdi. Esaki por wordo haci directamente na censo, caminda nan ta tuma tur detaye y si tin un rason cu tin duda cu ti algo straño den esaki, e mensahe lo wordo manda pa Cuerpo Policial, pa asina nan haci nan investigacionnan.
Antes, ora cu perde paspoort, tin cu pasa polis y cu esey tin di bin censo pa pidi pa paspoort. Esaki ta algun di e cambionan cu Sharin Luydens, hefe di Censo, a divulga, cu nan, hunto cu ministerio di Asuntonan Interior, un mercadeo nobo lo bay bin durante transcurso di otro luna.
Esaki lo bay ta un alivio mas pa e ciudadano cu e no tin cu bay polis, despues bin censo, etc. E pensamento aki tambe ta necesario den e papel di cinco florin. Segun Luydens, e registro di populacion ta un registro di gobierno, caminda cu tur e departamentonan cu mester di esaki, mester ta link na dje, pa asina ey ora cu ta bay busca un servicio na un otro departamento cu no tin cu bin te censo busca un papel di cinco florin, pa bay na e mesun gobierno, etc.
Un tratamento mas green
Den e cambio aki por bisa cu esaki lo bira mas green, pasobra no tin necesidad pa print e papel di cinco florin mas. Esaki lo scapa placa y aumenta e efectividad. Segun Luydens, esaki ta un di e cambionan cu ta hopi necesario caminda cu e lo bira un alivio pa no solamente ciudadano.
ID: poco, poco pero sigur
Desde cu a stop e cedula na 2014, a cuminsa cu un proceso di pidi aprobacion di FDA pa e fondonan, despues a bay destaho publico. E proceso ey ta un proceso cu ta dura largo, pero mi ta mirando e luz na final di e tunnel y tur cos bon pa yega na dje, mester haci sacrificionan pa yega na dje. E ta dura largo, pero e producto cu lo haya lo ta un producto di calidad, y tambe e eficiencia cu e ta trece cun’e, cu ta haya e cedula e dia eynan mes of e ora eynan mes cu bin, ta un balor agrega pa tur hende.
E proceso ey pa despues bay e destaho pa por a scoge esun cu a gana e bid, ta un proceso hopi largo. Pero awor aki, manera cu a scoge un suministrado. Desde e momento cu a haci esey, e compania cu a gana e bid, Multipost, a traha hopi duro mes. Pronto nan lo ta na Aruba, pa asina duna un demostracion con e proceso aki ta canando y dicon tabata importante, of dicon el a dura asina largo y kico ta e importancia pa haci cierto escogencianan cautelosamente.
Mester mas hende
Censo lo bay busca mas personal dentro di gobierno mes, wak si ta haya segun exigencianan di capacidad. Si no logra haya esaki, lo tin cu pidi minister pa por bay purba di tuma hende di afo. Algun aña pasa a tuma hende di afo cu cierto nivel y na su opinion a resulta pasobra a haci un cambio positivo den e organisacion. Na Censo, ora cu tuma hende cu kier traha, cu kier sirbi manera un bon ambtenaar, pa duna e servicio na e ciudadano, cu nan merece. Actualmente censo ta consisti 32 trahado. Tin hopi hefe di departamento cu ta pidiendo di cierto grado di nivel di enseñansa. Den pasado hopi departamento di gobierno tabata manera un dump politico cu ta pone cu e situacion ta pega den e departamentonan, Luydens a comenta.
