Aruba ta un isla hopi bunita cu tin un naturalesa cu mester preserva, medio ambiente ta un sistema forma pa elementonan natural y artificial cu ta relaciona cu otro y cu nan ta wordo modifica pa e accion humano, un tema cu lamentablemente hopi hende no ta dun’e mucho importancia.

Shanon Croes ta un persona cu ta stima naturalesa unda cu e ta dedica su tempo na esey, na aventuranan eco-friendly cu e obhetivo di promove diferente areanan rond di e isla como beachnan, mangelnan, tours di hiking, caminda tambe ta combina e naturalesa cu historia di e prome habitantenan di e isla, indigenanan Caquetio y e descubrimento di Aruba na aña 1499 pa Spañonan.

Den un entrevista special na Bon Dia Aruba, Croes a expresa cu e actividadnan aki ta eco-sostenibel unda cu nan no ta traha cu hermentnan como motor of azeta na momento di haci e tour na e mangelnan of beachnan cu kayak, e persona tin cu haci uso di su mesun forsa y energia, si e actividad ta cu snorkeling pa hopi biaha nan ta inclui den e tour di kayak unda nan tambe ta bay riba rif.

E idea aki a cuminsa basta aña pasa manera Croes a sigura, unda cu e ta gusta kayak for di algun tempo pasa y a cumpra un par pa asina por haci cierto actividad cu hendenan local of turista cu na final esey a bira su negoshi.

Croes a trece dilanti cu nan ta purba di haci e actividadnan di manera mas sostenibel tumando den consideracion e medio ambiente y eco sistema “nos ta purba di lag’e lo mas intacto posibel, esey ta e idea di nos”.

Un di e paisnan den region cu ta enfoca riba turismo sostenibel ta Costa Rica, Croes a manifesta cu nan kier tuma ehemplo ey unda cu nan a bay bishita e pais aki for di 13 pa 24 di april cu 12 invitado pa haci un otro tour na exterior pa cana den mondi, hiking na sero, bay den lama cu kayak, “actividadnan sostenibel tambe na otro pais y cu tin paisahenan bunita”

Na 2018 el a cuminsa traha cu The Shack Aruba pero experiencia cu kayak tabata presente for di basta tempo cu diferente ruta cu por cuminsa for di Santo Largo cu e Mangrove Tunnel Tour cabando na Mangel Halto y otro cu ta yama Mangel Halto Rif Tour cuminsando na Mangel Halto tambe, ta pasa na brug di Balashi unda nan ta bira riba un rif un rato y ta caba na Mangel Halto mes.

De vez en cuando nan ta haci distancia largo y ta p’esey cu diadomingo awor 29 di mei for di 6or y mey di mainta nan tin un evento di kayak cu ta cuminsa na Mangel Halto y lo caba na Moomba Beach, un recorido cu por tarda aproximadamente seis ora cu un cantidad di 10 participante cu dos of tres guia, segun loke Croes a informa.

Tambe, el a expresa cu esunnan interesa pa e evento aki mester tin experiencia di kayak cu distancianan largo “aunke e no ta asina dificil pero mester tin un tiki di condicion fisico, e persona mester conoce lama, rema, etc”.

Croes no ta e unico persona cu ta traha realisando e actividadnan aki cu kayak, tambe tin otro companianan cu ta haciel’e pero e diferencia ta cu nan ta haci distancia largo “mi ta purba cada biaha di haci algo diferente, como haci hiking cu kayak unda cu tambe nos ta cuminsa na Rodgers Beach y nos ta termina na Nikky Beach”, el a bisa.

Igualmente el a informa cu na juli di e aña aki tin un otro tour di cuebanan na Colony “cu ta mustra interesante” unda cu nan a habri e tour aki back despues di mas di dos aña di pandemia Covid-19.

Spañonan ta esunnan cu a descubri Aruba na aña 1499 y despues Hulandesnan a yega na 1636, e prome habitantenan di e region ta indigenanan Caquetio cu a bin for di Venezuela unda cu “Heritage” ta un di e actividadnan di hiking mas interesante pa conoce e historia di e pida di baranca aki, esaki ta cuminsa for di Rooi Lamoenchi y ta termina na Boca Prins Fontein.

Pa Croes ta importante cu “ora algun persona of gruponan ta haci un actividad pa disfruta di naturalesa pa tambe haciel’e di manera consciente sin produci menos sushi, ora nos ta bay den mondi no ta solamente nos ta bay cana, tambe nos ta duna informacion di ecosistema di flora y fauna, e parhanan, tur e bestia, di nos suela, nos ta bin di un isla volcanico, esey ta nos tera p’esey nos tin cu scoge pa haci mas actividadnan sostenibel pa cuida nos medio ambiente, nos tin hopi tempo draai cu turismo cu nos ta duna nan hopi nan kier, ora bo ta duna nan kier nan ta haci y deshaci di bo ecosistema y esey no ta e idea” el a finalisa.