26aug, NP, Shake (3).jpg

Oke, mi por bisa cu shake di proteina ta na moda. Bodybuilders, personanan fit, personanan cu no ta move, esunnan cu kier baha peso, enfin hende cu tur sorto di cantidad di actividad fisico (of no) ta bebe. Esaki ta pone mi puntra mi mes kico ta haci esey algo asina interesante. E ta saludabel, y mas ainda, tur e ‘hype’ realmente ta necesario?

E prome punto hopi importante pa menciona ta cu un shake di proteina ta un Suplemento. Bisando esey, kiermen cu si e ta wordo uza, e mester wordo uza den combinacion di un dieta balansa y combina e suplemento cu cuminda.

Shake di proteina ta proteina den forma likido, e meta ta pa bo haya suficiente proteina den bo curpa pa dia, pa asina bo curpa por crece. Pues mescos cu tur atleta ta haci, tur otro hende tambe mester maneha nan manera di come cu cuido pa evita complicacion di salud.

Busca informacion di profesional

E cantidad exacto di proteina cu un persona mester a base diario, ta depende entre otro di su cantidad di su peso, masa muscular, actividad fisico, edad y su salud. “Bisando esaki, mi ta recomenda pa bo busca bon informacion cerca un profesional prome di bo situacion, y no cuminsa bebe cos pa loco”.

 

Proteina

Proteina ta forma door di aminozuur, di cual nos curpa mes por traha hopi (aminozuur no esencial). Esunnan cu bo curpa no por traha (aminozuur esencial), por wordo obteni for di locual cu nos ta alimenta no mes cun’e. Alimento procedente di bestia ta contene mas hopi proteina cu aminozuur esencial cu nos mester. Sinembargo bo por haya esaki tambe for di vegetal.

Proteina for yuda bo baha di peso y mantene bo peso. Proteina ta importante den e parti di baha peso y ta esencial pa construccion di musculo. Manera kisas ya bo sa, pa bo por baha peso, e cantidad di caloria cu bo ta consumi mester te menos cu e cantidad cu bo ta kima. Comiendo suficiente proteina por yuda cu esaki. E ta subi bo metabolismo, loke ta pone bo kima mas caloria.

Ora cu 30% di bo consumo di energia ta (come y bebe) ta di proteina, bo ta kima 100 kilocaloria pa dia mas cu si bo consumo ta menos.

Necesidad di extra proteina

Los di e necesidad  diario di proteina pa masa muscular y metanan fisico. Hende cu fisicamente ta mas activo tin mester di mas proteina cu hendenan cu ta sinta henter dia of ta move poco. Pues, si bo trabou ta encera cu bo ta hopi fisicamente activo, bo ta cana hopi, core, landa, haci gym, e ora bo mester mas proteina cu e cantidad diario recomenda.

Nos grandinan tambe mester mas proteina, esaki por yuda nan pa preveni osteoporosis y cu nan ta perde hopi masa muscular. Por ultimo, hendenan cu ta curando di un lesion tambe mester mas proteina.

Tin informacion cu ta mustra cu cantidad excesivo di proteina ta pone extra presion riba bo riñon y cu e por causa piedra, tambe cu cerca hendenan cu tin problema cu riñon, e por acelera e malesa. Sinembargo tin otro estudionan cu ta nenga esaki.

 

Mi ta spera cu na e punto aki, e por ta cla cu un shake di proteina no por wordo uza como un reemplaso di cuminda, y principalmente no si bo no ta bou di un guia di un profesional. Hopi biaha hende ta lihe pa e ‘quick fix’, p’esey dietanan pa baha peso ta asina popular.

 

Kico ta Whey y Casein?

Dos palabra hopi comun pa scucha ora ta papia di proteina ta Whey of Casein. Ambos tin diferencia significante cu mester tene cuenta cun’e. Proteina Casein ta consisti 80% di proteina di lechi. No mester wordo uza ora cu ta purbando di acelera consumo di amino acid y ta wordo uza prome cu bay drumi. Whey ta un producto secundario traha di e lechi den proceso cu ta traha keshi. Mas o menos 20% di e proteina cu ta haya den lechi ta proteina Whey. Un di e beneficio ta cu e ta wordo absorbe lihe p’esey ta wordo recomenda pa e wordo consumi prome, durante of despues di ehercicio.

 

Recomendacion

E yabi ta un dieta varia y balansa, e ora bo no mester kibra cabes cu suplemento”, si despues di haci actividad fisico bo ta come bon, durante dia tambe bo a snack, y come bo cumindanan etc. no ta necesario pa agrega suplemento si bo ta sinti bon. Corda cu productonan procedente di bestia ta contene hopi proteina.

 

“Cuida bo curpa, y e lo cuida bo”