Shaindra “Black Queen Sha” Ashby no ta un persona desconoci den e mundo di farandula. E ta un bailarina, cantante, juffrouw di baile y coreografo cu ta baila desde un edad hopi jong. Shaindra ta conta Bon Dia Aruba su storia di con el a cuminsa den e mundo di farandula, su trabao- y proyectonan actual y su plannan pa futuro.

Shaindra ta conta cu su mama, Ceslin Yarzagaray, tabatin su grupo di baile, COT dancers prome y ora e tabata train su grupo di baile of duna show, su mama semper tabata cose paña pe tambe pasobra e tambe tabata kier bisti paña. Despues Shaindra su mama a lanta Danza Aruba, grupo di baile cu ta existi ainda, y aunke Shaindra semper tabata wak nan train, nunca el a drenta den e grupo. Un dia el a dicidi di purba train y el a ripara cu e por gara baile super lihe.

Shaindra su ruman muhe, Janice Boekhoudt, tin su scol di baile tambe, Pachanga cu ta mas den direccion di salsa, merengue, bachata, kizomba, tur cos cu ta mas comercial ora di bay un fiesta. El a cuminsa train na Pachanga y el a siña pasonan basico di salsa y di eynan e trayecto di bailarina a sigui flow y el a cuminsa cu su carera den baile.

Shaindra a sigui conta cu na edad di 15 aña el a cuminsa duna les di baile na scol di baile Pachanga, despues el a duna les na e grupo di baile di su mama y despues di eynan na 2013 el a lanta su propio grupo di baile, Empire Dancers. Cu Empire Dancers Shaindra a competi den Gang di Arte y na Aruba tin Talento tambe.

Aworaki Shaindra ainda mi ta duna les pa hoben cu su mesun grupo y el a bisa cu su intencion ta pa lanta un grupo mas pero pa adulto 18 aña bay ariba. Aworaki tambe Shaindra ta trahando cu e fundacion BrassaVola unda cu e ta un di e lidernan den tarea di baile.

Shaindra a wordo acerca tambe pa Ferdinand Franca, docente di CKV na Maria College Mavo, ex-school di Shaindra, pa haci algun baile pa e musical di Maria College Mavo, Planta Awe Cosecha Mañan y e lo ta cantando y bailando den e musical tambe.

El a yega di baile tambe ariba stage pa e artista local reconoci internacionalmente, Jeon y a yega di baile den videoclip pa Ataniro, Brian Dekkers y Valentino King. Como cantante el a yega di graba un cantica hunto cu P.Ferry Tonchi Boy titula “Keda Cu mi” cu a pega hopi na radio stacionnan di Aruba.

Shaindra ta conoci tambe pa su cuenta di Tik Tok cu tin hopi siguidor. El a splica cu durante pandemia, manera hopi hende el a cuminsa cu Tik Tok y el a djis cuminsa haciele pa diversion y sin intencion el a bira un cos grandi. “Mi no a spera cu mi lo wordo reconoci, mi nunca a spera cu e lo bay asina leu”, el a bisa.

Un Tik Tok di Shaindra a yega asina leu y a haya atencion di e cantante internacional Shakira. Den e Tik Tok Shaindra tabata baila un cantica di e cantante y esaki a comparti e baile di Shaindra ariba su pagina di Instagram.

“Tin biaha bo no por kere. Tur mi amigonan tabata puntra mi dicon mi reaccion tabata asina trankil, pero mi no tabata so con pa reacciona, mi djis tabata manera WAW. Shakira ta mi artista faborito y ta pe mi a cuminsa baila. Mi tabata wak e na HTV y mi tabata warda pa su number yega na HTV pa mi copie, pa mi baila cune. Mi a yega di haci playback show di Shakira, mi tabata obsesiona cu Shakira y ainda mi ta”, el a agrega.

Pa loke ta trata su plannan pa futuro, Shaindra a señala cu si e ta na Aruba ainda y e ta haciendo baile, e ta wak su trahando hopi cu diferente bailarina y cu diferente grupo. El lo desea tambe di tuma diferente curso afo pa expande su experiencia miho y el a bisa cu el lo por studia pa un diploma tambe. “Mi no tin diploma, pero mi ta bisa cu mi experiencia ta conta pa un parti di mi diploma”, el a splica.

A pesar cu e ta un bailarina reconoci den e mundo di farandula, e ta conta cu den su experiencia el a pasa den e problema unda cu e mester a baila pa un artista, el a train e baile y despues nan a sakele for di e baile, for di e videoclip, pa motibo di imagen di su curpa. Y tabatin hende cu tabata bis’e cu e no lo yega leu pa motibo di su curpa. El a expresa cu esey tabata un momento unda cu el a sinti hopi kibra. “Mi a sinti manera tur cos a bin abao. Pero esey tabata un di e motivacionnan cu mi a bisa mi tin un bon talento y mi no ta bay laga esey kibra mi y danki na esey mi ta e persona fuerte cu mi ta awo”.

Shaindra su mensahe pa comunidad, specialmente e hobennan ta: “No matter what, si bo ta un persona diki, bo ta un persona flaco, bo tin cabey krul, bo tin cabey fini, no tene miedo di mustra bo talento. Mi sa tin hende cu tin problema cu nan body image cu ta stroba nan di bay dilanti y esey no mester ta asina. Djis ta bo mes, bo por ta flaco, diki, bo por ta gay, bo por ta straight, loke sea, djis kere den bo mes y semper keda humilde pasobra ora bo ta humilde hopi porta ta habri pa bo”.