Recientemente durante e encuentro den Parlamento di Aruba pa trata e ley di matrimonio di mesun sexo, parlamentario di MEP, Shailiny Tromp-Lee a causa conmocion y sigur a hala hopi atencion den comunidad cu su decision pa abstene di vota. Su absencion a laga e votacion empata na 10 voto na fabor y 10 voto contra.
E parlamentario a tuma nota di e controversia y a comenta riba esaki directamente a traves di su pagina di Facebook, den un post titula “Shailiny Tromp-Lee a abstene!”
El a cuminsa reconociendo e conmocion cu su decision a causa, notando cu su abstencion a bira “noticia di e momento esaki ta sigur.” Siguidamente, el a aclaria cu “den mi 7 aña den Parlamento ta mi prome biaha cu mi ta abstene y mi kier pa boso sa cu mi abstencion tabata mi decision.”
Papiando tocante e duda y cuestionamento cu el a ricibi pa su decision, el a bisa:
“Mi kier tuma e espacio pa mi ta sincero cu boso y pa mi comparti mi sentimentonan “curu”. E ley aki desde un principio tabata hopi dificil pa mi. Un debate interno basta pisa a tuma y ta tumando lugar ainda. Mi ta memey. Memey [pasobra] mi ta compronde y mi ta sinti pa tur dos banda.”
Ademas, ya cu e ta conoci den comunidad pa ta un persona Cristian, ken hopi biaha ta ser mira na misa, el a splica su posicion:
“Di cas mi ta hopi religioso y esaki ta un fundeshi fuerte di mi fe, mi paz y mi stabilidad. Diariamente mi a y ta bati na porta di Papa Dios pa gradici y pidi. Den mi bida mi a pidie pa E haci milager y obra den salud di mi yiu y mi casa. Mi a bib’e di cerca. Dios a haci e milager den mi bida, el a sana mi yiu y mi casa.
“Di otro banda mi ta sinti pa e dicho amor ta amor. Mi no ta sinti ta na ami pa dicidi ken si of ken no. No ta na ami pa stroba felicidad di otro. Ken ami ta pa husga amor? Ami ta convenci cu mi Dios ta un Dios di amor.
“Mi dilema ta grandi y mi debate interno ta fuerte. Den mi trayectoria di bida ami semper tin mi opinion, por argument’e y present’e. Hecho ta, cu pa e topico aki esey ainda no ta e caso,” el a conclui.
