Manera ta biniendo den cla recientemente tin diferente instancia den cadena social cu falta structural di fondo y personal. Na Stichting Reclassering e situacion no ta mucho diferente, aunke segun directora Seraida Pemberton durante añanan nan a mira un desaroyo positivo: antes tabatin 3 trahado social so pero actualmente tin 10.
Mirando cu gobierno nobo tin interes pa integra mas departamento y ministerio di diferente tereno pa combati problemanan social mas structuralmente y holisticamente, Bon Dia a acerca un fundacion cu ta sinta central den cadena hudicial pero cual ta purba yega na su metanan pa medio di trata problemanan social: Stichting Reclassering. E fundacion aki tin ya caba 56 aña ta existiendo y ta purba resocialisa tanto menor di edad como adulto cu a cay den problema cu husticia. Pero prestando atencion special na e grupo di menor di edad cu ta bin den contacto cu husticia pa evita un circulo vicioso.
Rapport di Reclassering ta necesario pa tuma decision balansa
E directora di e fundacion ta conta cu e fundacion su trabounan y proyectonan ta amplio. “Nos ta traha cu hendenan cu a haya nan mes den problema cu husticia. Mayoria di biaha nan ta wordo poni bou guia di Reclassering, pero tambe nos ta traha un rapport di un persona y nos ta ehecuta e castigonan alternativo.” Rapport di un persona ta wordo traha despues cu Ministerio Publico (OM), hues of minister di husticia ta haci peticion pa esaki. E rapport sra. Pemberton ta compara na un Proces-Verbaal di polis, pasobra ‘un Proces-Verbaal ta conta tur e echonan di un crimen, mientras e rapport di Reclassering ta un informe riba e persona su circunstancia personal’.
Den sentido cu ora e acusado presenta dilanti hues, e hues tin e Proces-Verbaal cual ta bisa kico e persona a haci pero tambe e rapport di Reclassering cu ta indica ken e persona ta, e desaroyonan den e acusado su bida personal y kico por a causa e persona pa yega asina leu di comete un delito. Ademas Reclassering ta delinea e ayudo cu e acusado lo tin mester di dje pa no bolbe cay cera of comete un delito. “E rapport ta hopi importante pa hues y tambe fiscal ora di pidi castigo. Ley ta bisa cu mester tene cuenta cu e circunstancianan personal di e acusado. Pues a base di e rapport por yega na un decision mas balansa.” Desde 2009 e fundacion tin un acuerdo fiho unda ta stipula cu tur hoben cu cay cera ta wordo raporta na Reclassering sea via Jeugd-en Zedenpolitie of pa OM. “Ora nan cay cera nos ta bishita e hoben dentro di 5 dia na warda di polis pa asina quick scan nan situacion y informa Ministerio Publico riba nan situacion mas pronto cu ta posibel.” Despues di evalua esaki OM ta dicidi di prolonga e detencion of laga e hoben bay, cual mayoria di biaha Reclassering ta boga p’e.
Guiansa bou Reclassering
Tin diferente caso cu ta yega na un castigo alternativo of mas abou cu normal pa via di e rapport cu Reclassering ta traha. Sinembargo sra. Pemberton ta splica cu ora yega asina leu tanto fiscal, hues of minister di Husticia por exigi cu e acusado cay bou guia di Reclassering pa un tempo stipula. E guia cu ta wordo duna ta wordo evalua a base di e categorisacion di e acusado. Esta cu tin diferente nivel di riesgo: riesgo halto, riesgo medio y riesgo abou. E nivel di riesgo ta wordo determina a base di e chens cu e persona cu a comete e delito lo comete esaki atrobe pa via di entre otro circunstancianan na cas, influencia negativo di cierto amigonan of uzo di droga.
A base di esaki Reclassering ta traha un plan di maneho riba con pa trata e puntonan cu falta atencion den e persona su bida. Esaki por bin den diferente forma: sea ta problemanan causa pa pobresa, pasobra un hoben no ta bay scol, no tin nada di haci despues di scol, of cualkier otro rason.
E guiansa ta encera cu ta conscientisa e hoben riba e retonan cu e hobennan tin den nan bida y ta brinda e hermentnan necesario pa corigi esaki na su raiz. Pa adulto tambe ta duna curso y guiansa pa ‘anger management’ ora un persona comete un delito relaciona cu violencia y pa persona cu ta sinta tras di stuur mientras ta bebi ta duna cursonan tambe.
E team na e fundacion te hasta ta haya ayudo riba con pa duna guiansa cada 2 aña tanto na individual como gruponan di hoben. Hulanda a yuda e fundacion prepara pa e casonan aki segun sra. Pemberton, bisando cu ‘nos Reclassering mescos cu Reclassering na Sint Maarten ta na mesun nivel cu Hulanda’.
‘Criminalidad bou hoben no a aumenta pero e delitonan si a bira mas pisa’
Nos a puntra e fundacion si nan tin cifranan disponibel unda nan por mira desaroyo den e tipo di delitonan cu ta wordo cometi pa hobennan y e motivacion of circunstancianan tras di e casonan.
Segun sra. Pemberton criminalidad bou hobennan no a escala drasticamente. E casonan cu ta wordo raporta na Reclassering ta yega na un promedio di 80 pa 90 caso pa aña. “Locual si nos a cuminsa ripara ta cu e delitonan cu e hobennan ta cometiendo si a bira mucho mas pisa. Delitonan basta pisa cu no tabata cometi pa hobennan, solamente pa adulto awo si nos ta mirando bou hoben. Es mas, e edad mas abou di hobennan cu ta comete e delitonan pisa aki ta bahando. Antes e promedio tabata 17 y el a baha pa 15. Aworaki e promedio ta mas o menos 13 pa 14 aña di edad ora hobennan cay cera.” Esaki ta algo cu mester pone atencion riba dje, segun sra. Pemberton paobra ‘e no ta bayendo den bon caminda’.
Entre e gravedad di e delitonan por mira un variacion: delitonan leve por ehempel ta horta un bais mientras delitonan mas pisa ta bringa riba caya, ta den posesion di arma blanco of arma di fuego , bendemento di droga y maltrato severo. Pa via di tin tanto aña di experiencia den e tereno aki Reclasserinng ta observa cada biaha mas trends bou hobennan. P’esey e fundacion ta bin cu diferente proyecto unda ta purba enfrenta e problemanan na nan raiz.
Proyectonan cu e fundacion ta ehecuta
Algo cu Reclassering a nota ta cu hopi di e hobennan cu ta cay den problema cu husticia ta yega asina leu pa via di no bay scol. Ademas ora yega asina leu despues cu e echo tuma luga hopi biaha e hobennan no por drenta scol bek mes. P’esey e fundacion a bin cu e proyecto ‘leerwerktraject’. Aunke e proyecto aki actualmente a wordo pasa over na Openbare Avondleergangen bou gobierno, e fundacion a mira un exito grandi cu e proyecto. Esaki pa via di integra un programa di educacion di 1 aña cu un chens pa drenta bek den mercado laboral. Te hasta a habri e programa pa un grupo mas amplio. E tabata un necesidad pasobra ‘hopi biaha ora hende cay den problema cu husticia nan ta haya dificultad pa haya un dunado di trabou cu lo tuma un persona asina. Asina e persona ta cay bek den e circulo vicioso’.
Riba e proyectonan cu e fundacion ta ehecutando pero tambe e proyectonan cu Reclassering ta desaroyando nos los elabora riba dje den un proximo edicion.
