Departamento di Husticia ta informa cu ex trahado Egbert Yvan Koolman (49) a declara su mes culpabel di conspiracion di labamento di placa. E ta un di e casonan for di Panama Papers.
E personanan y companianan envolvi a paga 1,3 miyon dollar pa asina influencia sr. Koolman pa regla contractonan cu Setar. Sr. Koolman ta admiti asina di hunga un rol den e estafa di regla y ricibi pagonan corupto, asina e departamento ta bisa den un relato.
Estafa
Sr. Koolman ta admiti cu entre 2005 y 2016 el a opera e estafa di laba placa den su funcion como Setar’s product manager. Hunto cu un otro sospechoso (sr. Parker) y otronan nan a transmiti fondonan di Florida y otro camindanan na Merca pa Aruba y Panama. Asina pa promove e estafa di corupcion y wire fraud. Nan a priminti sr. Koolman placa y el a ricibi sobornonan di hende y di companianan situa na Merca. Di su banda e tabata percura pa nan haya contractonan lucrativo na Setar. Banda cu el a ricibi mas cu 1,3 miyon dollar, el a admiti tambe pa comparti informacion confidencial di Setar cu e bendedonan preferi.
E sentencia ta planea riba 27 di juni. Manera Bon Dia a skirbi sr. Koolman ta deteni.
E relato tambe ta menciona un otro sospechoso, esta Lawrence Parket (42) cu tambe a declara su mes culpabel di conspiracion, violando e Foreign Corrupt Practices Act y cometiendo wire fraud. Su sentencia lo cay riba 30 april.
E investigacion ta den man di FBI, seccion special pa corupcion internacional.
