Declaracionnan di compania estatal Setar pa medio di su vocero Suzy Maduro riba e tema di estafa multi miyonario ta laga hopi pregunta riba mesa.
Despues cu pa medio di un publicacion haci pa Miami Herald, prensa local a trece dilanti e noticia di loke ta parce di ta un di e estafanan mas grandi den historia di Aruba. E noticia a causa un ola di reaccion den comunidad pa cual Setar a manda un comunicado por escrito confirmando e noticia pero na mes momento den cierto sentido ta cera porta pa prensa local haci pregunta.
Hopi biaha tin e impresion den pueblo cu prensa local no ta haci su trabou pero aki nos ta laga seis pregunta cu a wordo haci na vocero di Setar sin por haya un contesta concreto cu no ta: “lo follow up cu gerencia.”
Preguntanan
1) Con bin a permiti pa laga e responsabilidad di compra den man di 1 solo persona?
2) Kico precies e conseho di supervision ta controla ora nan haya sumanan di riba 100 mil florin pa aproba?
3) Nos tin declaracion di un fuente anonimo cu FBI a haci bishita na Setar na december, pakico esaki a pasa y kico a haya?
4) A compronde cu na december ora a retira e empleado a yega na un acuerdo cu ne pa no bay OM. Si ta papiando di sumanan cu ta core den miyones, pakico a yega na e acuerdo aki?
5) Ta bay tin consecuencia pa e director ya cu bou su maneho a permiti esaki pasa?
6) Con ta eligi conseho di supervision y cada pasa cuanto tempo?
Conseho di supervision
Pa loke ta e conseho di supervision di Setar, tin diferente pregunta cu mester aclaracion. E conseho actual tin exactamente 7 aña activo segun registro di Camara di Comercio y ta consisti di hendenan respeta den comunidad cu a of ta carga posicionnan respeta den comunidad manera polis, director di DTZ, comerciante y mas. E no ta cla ki tipo di supervision ta wordo haci pa e conseho aki ya cu e ta cuestionabel cu 1 solo persona por a tuma nan tur haci.
Un otro pregunta cu mester aclaracion ta cada pasa cuanto tempo ta eligi un conseho di supervision y na ki forma esaki ta bay. Bon Dia Aruba tin confirmacion cu tur suma riba 100 mil florin mester bay cu aprobacion di e conseho di supervision, e ora kico exactamente a supervisa? A bira comodo y negligente durante e 7 añanan aki of e empleado tabata asina inteligente? E scenario aki ta pone Setar den posibel dudanan y no ta mustra nada bon. En todo caso, nos ta warda riba contestanan di Setar.
Reaccion vocero
Den contacto cu e vocero di Setar, su prome reaccion tabata pa bay na e comunicado cu nan a manda. A mustra e vocero cu e comunicado no ta contesta e preguntanan haci y segun e, e lo mester contesta pa su siguiente dia pasobra tin pregunta cu e no por contesta di biaha. A tuma contacto un biaha mas cu e vocero y a comprende for di su persona cu e lo ta malo y a tuma liber. E vocero a termina bisando cu e lo follow up cu gerencia y asina cu e tin e contestanan e lo manda nan.
