No ta custumber di Setar pa reacciona riba noticianan falso cu ta circula riba social media. Nos tur sa cu den e temponan dificil cu Aruba ta pasando aden cu e COVID-19 a bira normal pa tur dia DVG y otro instancia mester sali y contra-aresta tur dia noticianan tendencioso cu ta sali y cu totalmente no ta cuadra cu e berdad. E pakico hendenan ta fabrica e storianan ta keda un misterio. Por ta hende gusta causa panico den comunidad.
Mescos tin articulonan cu ta bay asina leu cu ta relata 5G cu Corona Virus. Storianan cu parha a muri y 5G tin influencia riba abehanan, etc etc. Cu na Wuhan ta promer lugar na China cu a implementa 5G y pesey e virus a cuminsa eynan. No ta berdad. Wuhan no ta e promer ciudad na China cu a instala 5G. Pues e storia nan aki ta totalmente FAKE NEWS of NEP NIEUWS. E programa Brandpunt di e canal di TV hulandes NPO3 a traha un reportahe tambe na unda nan a analisa 5G specificamente e FAKE NEWS di 5G y Corona Virus. Esnan interesa por bay ne link www.npo3.nl/brandpuntplus//5g-veroorzaakt-corona-nepnieuws-dat-in-30-dagen-de-hele-wereld-bereikte. Den e reportahe aki ta trata tambe diferente otro FAKE NEWS cu ta relata na 5G.
SETAR y tur compania di Telecomunicacion di mundo ta sigui e locual World Health Organisation (WHO), e autoridad maximo mundial riba salud, ta recomenda ariba e tereno di señalnan di radio manera 5G. WHO na su turno ta formula su recomendacion a base di guia di e International Commision on Non-Ionizing Radio Protection (ICNIRP). ICNIRP a caba di publica su rapport riba 5G na comienso di Maart 2020 a base di añas di research. Esnan interesa pa lesa e rapport scientifico aki den su totalidad por bay na www.ICNIRP.org of lesa por ehempel un articulo di The Guardian https://amp.theguardian.com/technology/2020/mar/12/5g-safe-radiation-watchdog-health cu ta splica esaki tambe.
ICNIRP ta mantene su conclusion pa loke ta 5G. Si mantene na e normanan di ICNIRP segun WHO no tin ningun caso conoci di peliger pa salud den mundo. SETAR mescos cu tur compania ta usa e normanan di ICNIRP y ta cumpli estrictamente cu e normanan aki.
Finalmente un palabra di cautela na comunidad pa tene hopi cuidao cu FAKE NEWS cu ta creciendo di forma espantoso den ultimo tempo.
