Den un carta fecha 20 di januari 2022 dirigi na ministro di Asunto Economico, Desaroyo Sostenible y Comunicacion, Geoffrey Wever, director di Setar NV Roland Croes ta propone pa paga full salario na empleado, gerencia y comisarionan e aña aki, mientras ta percura pa baha gasto di payroll a traves di a baha cantidad di cupo di trabao na e empresa. Cu esaki e compania tin pensa di termina cu e tension actual bao di e empleadonan y tambe cu e debate continuo cu sindicato.
E empresa ta constata cu na 2020 a entrega Afl. 4,9 miyon riba cuenta di Fase, y cu e terminacion di e programa ey, ademas di e subsidio di salario tambe, e empleadonan no ta mira pakico nan lo mester sigui contribui na e asunto di baha gasto den e aparato publico, di cual nan como trahador den sector priva no ta forma parti. Ademas na 2020 Setar NV lo a implementa un plan agresivo di baha gasto di personal a traves di un plan di retiro (‘afvloeiingsregeling’) y tambe a bay traha mas eficiente, tambe pa crea espacio financiero a mediano y largo plazo pa e empresa.
Den e carta ta propone dos alternativa pa yega na cumpli cu e exigencia di 12,6% sin cu mester corta e salario di e trahadornan:
Contempla posibilidad pa Setar den e aña coriente por recorta gasto di personal cu tal suma, cual lo ta “match” e suma cu ta spera di haya cu e recorte di 12,6%. “E empresa ta kere cu ta actua den espiritu di e meta primordial di baha gasto di personal y cu esaki ta crea espacio financiero pa su mes”, e carta ta bisa. Esaki segun Setar lo keda un asunto interno ya cu Setar no ta haya subsidio, ni mester tampoco.
E empresa por contribui na e reduccion di e necesidad di financiamento di Pais Aruba, entregando un suma igual na loke ta anticipa di haya a base di e recorte di salario cu ta pidi e empresa implementa, den forma di “(extra) dividend”. “Den esaki ta supone cu Hulanda ta sali di e punto di vista cu tur e entidadnan liga na Pais Aruba lo ta envolvi den reduccion di e necesidad di financiamento di Pais Aruba, sea directo o indirecto.”
Pa loke ta e alternativa nr. 1 Setar ta argumenta cu na 2021 e empresa a reduci gasto di payroll cu Afl. 2,7 miyon, a base di e afvloeiingsregeling di fin di 2020. Pa 2022 ta anticipa un reduccion di gasto di Afl. 2,6 miyon, pa 2023 Afl. 2,3 miyon y pa 2024 Afl. 2,0 miyon. Segun Setar, na 2021 e recorte di salario a resulta den un suma di Afl. 3,0 miyon, Si continua cu e recorte, anto ta anticipa cu pa 2022 te cu 2024 esey lo produci respectivamente Afl. 3,1 miyon, Afl. 3,2 y Afl. 3,2 miyon. Esaki ta implica cu e alternativa aki lo produci menos beneficio cu loke ta calcula a base di e recorte di 12,6%.
E segundo alternativa ta trata di duna gobierno un (extra) dividend den e añanan 2022, 2023 y 2024 cu ta igual na e suma cu Pais Aruba lo a haya di e empresa, ehecutando e recorte di 12,6%. E argumento pa esaki ta segun Setar cu e areglo di layoff crea na 2020, di cual e pagonan ta tuma lugar den e proximo añanan, “no ta diferencia sustancialmente di e suma cu mester entrega na Pais Aruba y asina pa un gran parti a crea e espacio pa e pago di dividend aki. Pues por paga un dividend (extra) den e añanan 2022 te cu 2024,” e empresa estatal ta skirbi.
Setar NV ta bay inverti den cable marino y glassfiber
Den e mesun carta dirigi na ministro Geoffrey Wever, gerencia di Setar NV ta duna un splicacion di e situacion financiero di e compania. Ta constata cu na 2020 a sufri un perdida, cu a keda compensa for di e reservanan di ganashi.
Setar ta constata cu e empresa ta uno intensivo den uso di capital, operando den un mercado cu un ciclo di bida cortico di producto di telecomunicacion. E empresa ta financia su operacion a traves di prestamo bancario y e actual exigencianan di banconan pa cu solvencia y liquidez di e empresa lo ta limita e sumanan cu lo por fia. Den futuro cercano ta señala dos proyecto di importancia, cualnan ta un sistema di cable submarino pa internet y un conexion di glassfiber pa tur hogar na Aruba.
Esaki ta trece cune cu Setar ta tratando di compensa e perdida di 2020 mas pronto posible, anticipando cu e banconan lo ta mas estricto. Sin embargo, pa acomoda e dividend extra na gobierno, ta propone pa haci e recuperacion di e reservanan propio tuma lugar durante mas aña.
E propuesta di gerencia di Setar ta pa bay di acuerdo cu e segundo opcion, di pago di dividend (extra). Por haci e pago di dividend dividi pa cuartal y di e manera aki Setar no lo mester mantene e recorte di salario pa su personal y gerencia.
For di bon fuente Bon Dia Aruba a comprende cu fin di januari Setar NV a paga e salarionan di tur personal completo caba. Aparentemente a haya aprobacion caba di e mandatario pa esaki.
E carta di Setar ta termina bisando cu ta spera cu di e forma aki por termina “e disputa cu sindicato”. Redaccion di Bon Dia Aruba a tuma contacto cu oficina di ministro Geoffrey Wever paa comentario riba e carta aki. Te na ciere di nos edicion nos no a ricibi un respuesta.
