Riba e fecha di 1 di februari di aña 2003, Setar N.V a wordo funda y ayera e compania aki a cumpli su 20 aña di existencia. Pa celebra e ocasion, a invita minister di Comunicacion Geoffrey Wever, miembronan di directiva, entre otro, na unda director di e compania, Roland Croes a presenta con e compania a crece den 20 aña aki y na unda nan ta bay.
Den esaki, Croes a señala cu den e video cu a mustra a splica tur nan trayectorio y esey lo wordo pasa tambe den diferente medio di comunicacion pa asina comunidad por wake. “E tabata un reunion informal unda nos a discuti riba kico nos ta pasando y con nos ta bay dilanti. P’esey nos a invita tur di nan y tambe prensa pa nan por ta testigo den un dia asina, cu mi ta kere nos no por laga pasa tampoco. Mester celebra pasobra mirando unda e compania a cuminsa y unda nos ta bayendo awe, ta pasonan grandi a tuma luga den añanan ey y hopi biaha hende a lubida pero, mi ta kere ta bon pa bo record’e back,” Croes a expresa.
Pa loke ta trata e retonan cu e compania a confronta den e 20 aña aki, Croes a sigura cu na aña 2003 nan tabatin un tipo di internet hopi diferente na esun di cu ta wordo usa awor, nan tabatin telefonnan cu no tabatin screen di color mes, nan tabatin fax, unda edificionan tabata den un estado no manera nan ta awe unda nan a mester reinventa y drecha nan full, na e momentonan aki, 20 aña despues e telefonnan ta computarisa completamente, speed di internet ta 300 biaha mas hopi, awor e tecnologia ta permiti pa hendenan traha for di nan cas, por traha videonan live, cu un internet cu companianan manera Netflix of Facebook, ni un tabata t’ey mes y awor Setar N.V tin tur e tecnologia aki.
E campañanan manera ‘WOW’ of esun di ‘Setar di bo tambe’ ta cosnan cu hende ta record’e y e actividadnan unda hende ta core rond, “tur eseynan a pasa unda nos wak 7.000 of 8.000 hende a sinta wak, e hubentud y artistanan cu a sali for di dje, esey ta e Setar cu nos a cuminsa y esey tabata tur e tecnologia cu tabatin eytras,” Croes a recorda.
Di loke ta trata e servicio, el a bisa cu Setar ta un compania di casi 90.000 cliente na unda awendia ta un compania cu tin di 180.000 pa 200.000 account, ta e compania dos biaha mas grandi di loke ta servicio cu tabatin mas di 430 trahado y awor tin 380 trahado.
Pa aña 2028 nan no kier pa tin koper ni nada mas sino puro fibra optico y un mundo 5G cu den aña 2030 kisas por bira 6G, “esey ta e mundo cu nos ta aden.”
Pa finalisa, el a gradici na diferente gobierno cu a pasa den e 20 aña aki incluyendo minister Wever y e Raad van Commissaris cu a duna na e compania e oportunidad y e sosten den tur nan proyecto na unda cu den e añanan aki nan a haci un inversionnan cu a pasa di 800 miyon florin yegando casi na un biyar florin.
