Den cuadro di celebracion di 40 aña di nos Himno y Bandera y 30 aña di Status Aparte e compania nacional di telecomunicacion Setar ta uni na e actividad rond di festividad aki. Suzy Maduro di Setar a bisa cu e compania aki a nace na man cu Status Aparte 30 aña pasa.
“Setar ta e prome compania Rubiano di telecomunicacion cu a nace cu Status Aparte”, el a bisa. Durante e tres ultimo decada a wordo registra un desaroyo den diferente sector na Aruba y Setar como compania di telecomunicacion no ta un excepcion. Entre otro desaroyo tecnologico nan a bay di e sistema analogo pa digital. Encuanto prestacion di servicio nan a bay di dos servicio inicialmente pa varios servicio cu nan no por a imagina na 1986 cu nan lo por ofrece awendia.
Promocion, actividad y competencia
Otro siman Setar lo ta lansando diferente promocion riba producto specialmente durante e fin di siman largo di Himno y Bandera. Un oferta masha yamativo tin di haber cu Setar lo bay habri tur canal di Cable Tv for di 17 di maart te cu 21 di maart. Nan ta alrededor di 256 canal cu lo wordo habri completamente gratis pa e clientenan di Cable Digital cu no tin e canalnan aki ainda.
Setar ta un di e sponsor primordial di e Festival di Canto y Himno y Bandera pa nos hobennan dedica na Aruba durante fin di siman ultimo. E fin di siman nan ta bay tin evento di Cantamento di Himno y Bandera na Linear Park. E tabata un serie di competencia di cantamento d infantil, hubenil y adulto.
E aña aki nan ta join tambe e competencia di poema cu Departamento di Cultura Aruba (DCA) a lansa y tambe un competencia di pintamento di scolnan. E competencia di poema tin di haber cu e celebracion di 30 aña di Status Aparte y 30 aña Setar Creando Conexion pa Aruba.
Mientras cu e competencia nacional di pintamento lo participa mas cu 40 scol basico y special. Lo conoce dos categoria pa seleccion na e scolnan ganado, un di prome te cu di tres klas; y e di dos fei di 4 te cu 6 klas. Tambe e mucha cu su pintura ta sali premia ta haya un premio. Kiermen e scol cu a participa por a gana; y e mucha cu a pinta e obra ganado, Setar lo tin un premio pe.
“Pasobra esey ta nos tarea primordial y por bisa cu satisfaccion cu Setar ta orguyoso di Aruba, y orguyoso di tur e posibilidad cu nos tin como Arubiano awendia”, el a bisa. R exigencia mester ta cu e obra mester ta original y den Papiamento di Aruba, minimo dos strofa y maximo cuater. Cada strofa mester consisti di cuater liña y e rima ta opcional.
Tambe Setar a lansa den edicion limita un T-shirt specialmente den cuadro di e celebracion di 18 di Maart cu e lema: “Arubiano Orguyoso”. E ta un diseño special y e ta obtenibel den tur e tele-shop di Setar pa 15 florin. E T-shirt ta hopi original y e ta decora cu sitionan historico di Aruba.
Campaña
Setar a lansa tambe un campaña ariba Facebook caminda nan por expresa kico ta pone nan sinti nan mes Arubiano orguyoso. Nan por expresa esaki pa medio di un poesia, video of comentario. Lo tin premionan special pa esaki.
Otro actividad ta e poeta di Patria cu lo tuma luga 14 maart den Museo Historico situa na Fourt Zoutman. Intencion ta celebra e evento aki den grandi cu un anochi di gala. E inscripcion y participacion pa tur esnan inspira pa honra nos patrimonio ta habri te 11 di maart venidero. E topico ta tocante Aruba su patrimonio den cuadro di cultura, historia, herencia, folklore, tradicion, flora, fauna y musica. Obviamente nos Status Aparte y nos Himno y Bandera ta forma parti di esaki.
