(NLTimes) – Apesar cu mayoria di residente na Hulanda a vota den contra di un ley cu ta permiti ‘data mining’ di escala grandi den un referendum den aña 2018, esaki tecnicamente ta posibel via cablenan di internet y pronto lo ser usa pa servicionan di inteligencia Hulandes.

‘Data mining’ ta e acto di usa data, cual hopi biaha ta contene informacion manera edad, genero, preferencia, etc, pa asina crea campaña of avisonan mas personalisa y directo. Esaki ta kibra varios promesa haci pa e ex minister Ronald Plasterk segun loke Volkskrant a reporta basa riba informacion di e reguladornan TIB y CTIVD.

Un mayoria a vota contra di e Intelligence and Security Law den un referendum na maart di aña 2018, causando cu e Gabinete a haci cierto cambionan den e ley cual lo permiti e servicionan di inteligencia AIVD y MIVD pa haci uso di trafico telefonico y riba internet riba un escala grandi. Un di e promesa tocante esaki tabata cu nan lo haci esaki di e manera “mas selecciona cu ta posibel.” Ronald Plasterk, ken tempo aki tabata Minister di Asuntonan interno y responsabel pa AIVD, a priminti explicitamente cu e ley no lo ser usa pa mira comunicacion di henter barionan.

“Intercepcion di tur comunicacion den un cierto districto Hulandes of bario pa un cierto periodo bao di ningun circumstancia lo pasa e test contra e rekisitonan legal manera proporcion y subsidio,” Plasterk a declara. E uso di e ley aki pa usa data di henter barionan hopi biaha tabata ser cataloga como intencionalmente causa miedo den pueblo. Rob Bertholee, ken tabata director di AIVD, a conta media den 2018 cu e no por imagina e servicio drentando e comunicacion di henter un bario. “Nos no ta bay haci esaki.”

Sinembargo, awo ‘data mining’ ta posibel na un escala grandi, Volkskrant a reporta. Personanan involucra a conta e corant cu AIVD y MIVD tin plan di intercepta data den cablenan grandi manera di Eurofiber y Relined, companian cu rednan extenso na Hulanda y ademas ta conecta cu cablenan di internet transatlantico. Esaki ta haci cu tecnicamente e ta posibel pa yega na hopi mas comunicacion cu un solo cable di un solo proveedor, e corant a splica. “Efectivamente, bo ta papiando di henter Hulanda,” un persona involucra a comenta.

Dos aplicacion pa uso di cable di data haci pa AIVD y MIVD aña pasa ta demostra cu e servicio kier bay mas leu di loke a priminti. E minister a aproba e aplicacionnan. Sinembargo regulador TIB a rechasa esaki como fuera di ley pa motibo cu e no tabata di manera “proporciona, e no tabata subsidia y tampoco tabata selecciona algun persona en especifico.” Esaki ta nifica cu un solo intercepcion lo duna acceso na comunicacion di “miyones di ciudadano.” E servicionan kier continuamente warda e comunicacionnan aki y mantene por lo menos pa un aña, cu un extension posibel pa 3 aña.

TIB a bisa cu nan servicio no ta specifica kico nan kier saca for di e informacion na cual nan lo haya acceso.