(AP) – Omegle, un servicio cu ta conecta usuarionan cu personanan desconoci di manera aleatorio, lo cera despues di 14 aña despues di mal uso amplio di e plataforma, particularmente den e abuso sexual di menornan di edad.
Den un declaracion largo anunciando e sitio web su ceramento, fundador Leif K-Brooks a reflexiona riba con Omegle su proposito tabata di conecta personanan den henter mundo y “fomenta e cosnan cu mi tabata stima di internet.” Sinembargo, el a agrega cu un parti scur di e plataforma a cuminsa surgi. “Practicamente tur herment por ser usa pa bon y pa malo,” Brooks a skirbi. “No por tin un contabilidad honesto di Omegle sin cu nos admiti cu algun persona a haci mal uso di esaki, incluyendo pa comete crimennan sumamente grave.”
Durante añanan, Omegle a enfrenta critica significante pa bira loke algun ta bisa un punto clave pa pornografia y otro abusonan. E sitio web su ceramento ta bini mas o menos un siman despues cu Omegle a aregla un demanda cu a acusa e plataforma di a conecta un mucha di 11 aña cu un predador sexual, segun recordnan di corte.
E demanda, cual a ser entrega na corte di Oregon na aña 2021, ta un cadena largo di litigacion cu Omegle a enfrenta. Segun BBC, e plataforma a ser menciona den mas di 50 caso contra pedofielnan den e ultimo 2 aña. “Opera Omegle no ta sostenibel mas, ni financieramente ni psicologicamente,” Brooks a skirbi. “For di e profundidad di mi curason, danki na tur hende cu a usa Omegle pa propositonan positivo y na tur hende cu a contribui na e plataforma su exito di algun manera. Mi ta hopi sorry cu mi no por a sigui lucha pa boso.”
Brooks a funda Omegle na ana 2009 cu 18 ana di edad. Ademas di a tin miyones di usuario diario durante e añanan, videonan di Omegle ta comparti ampliamente riba YouTube y plataformanan di rednan social manera TikTok.
Cuminsando for di diahuebs mainta, e website di Omegle ta live pero solamente cu Brooks su declaracion. Su funcion di videochat no ta visibel mas.
