E boroto di hopi hero cayendo a lanta tur bisiña di zona industrial di Guayabal, na Caracas – Venezuela. Hopi asombra nan a mira con un tore di comunicacion di 40 meter a cay. E compania CANTV hunto cu MOVISTAR, tur dos empresa di telefon na Venezuela, tabata comparti e tore pa duna bon servicio na e localidad.
E tore a cay despues cu delincuente a bay cu tur cos di e tore, te cu e nutnan cu tabata sostene e tore aki. Cable di cobre y motogenerador ta e ultimo robo di tur e seisnan, cu e tore aki a sufri den e aña aki caba, entre e cantidad cu empresa di telecomunicacion na Venezuela a sufri. E situacion aki ta perhudica e servicio di telecomunicacion gravemente. “Awor na Venezuela ta posibel pa bende tur cos, y hende ta haci cualkier cos pa sobrevivi” Victor Martínez, gerente di MOVISTAR a bisa desde diferente stacion unda delincuentenan a horta bateria y compresor.
E delincuentenan ta dentra mey anochi y ta haci uso di e oportunidad cu e stacion ta localisa na un lugar leu y cu tiki poblacion, pa horta tur cos cu nan por haya, y mesun momento kibrando tur proteccion cu e stacion tin.
“Nos ta kere den inverti e placa den ekipo nobo y moderno, y no pone placa pa protege e stacion aki manera un bunker di guera” Martínez a bisa. E compra di ekipo nobo por costa cerca di 4.000 miyon bolivar (US$ 5,9 miyon segun indice di cambio oficial).
E situacion aki ta afecta e velocidad di internet. Internet di Venezuela ta esun mas lento di henter Latino America, Cepal a bisa. Movistar a sufri mas di 636 robo, un cifra hopi halto compara cu 2015.
E problema ta hopi grandi pasobra ciudadnan manera La Vela de Coro, na costa di Venezuela, ta isola pasobra ta imposibel di haci o ricibi yamada di ningun compania di telefon, segun denuncia di habitante.
