Den cuadro di e plan di siguridad cu a ser traha pa cu e celebracion di Aruba su Carnaval, diadomingo ultimo a keda instala pa e prome parada grandi di mucha e set up completo di e Pre Hospital, unda personanan tin e garantia di ricibi servicio di prome auxilio sin cu mester di bay hospital.
Esnan cu ta encarga pa duna e servicio na e publico den e Pre Hospital ta personal di Dr. Horacio Oduber Hospital (HOH) y di Rode Kruis Aruba.
Crisis Management Office (CMO) Aruba ta e instancia cu a keda encarga pa parti logistica pa asina percura pa e set up completo di e facilidad di e Pre Hospital.
Comunidad di Aruba pa medio di e Pre Hospital aki, tin e garantia di por ricibi e di e servicio di prome auxilio sin cu mester bay directamente na e servicio di emergencia di Aruba su Hospital pa un incidente chikito/leve.
Cu e servicio aki ta yuda na baha e fluho di personanan cu ta bin haci uzo di servicio di emergencia di HOH.
Recientemente, gruponan di mucha y adulto cu ta participa na e paradanan di Carnaval 2024 a entrega nan plan di siguridad pa nan respectivo grupo.
E plan ta contene tur informacion necesario cu cada un di e partnernan cu tin un of otro tarea pa cu e celebracion di Carnaval. Den e documento aki tur partner tin e persona di contacto pa den caso cu un situacion di emergencia presenta, nan sa mesora kende nan mester comunica cune y atende e asunto en cuestion.
Ta spera cu mirando cu e gruponan cu ta participa na e paradanan di Carnaval tin nan plan di siguridad formalisa, ta keda awor na e publico pa nan por comporta nan mes manera mester ta, pa asina cada grupo por presenta nan trahe, obranan di creatividad, nan artenan, etc, riba e ruta di e parada sin cu nan ta ser stroba.
