E sistema di sticker lo continua cun’e pa e aña venidero, segun vocero di Servicio di Impuesto, Meverly Romano. Solamente cu e color di sticker lo bay bira otro. E color ta keda determina pa cuerpo policial. A base di esey e ora ta laga traha e stickernan na e color cu polis ta pensa cu e ta mas miho visibel pa nan riba caya, e ora ey ta cuminsa e aña fiscal nobo cu otro color.
Evaluacion:
Awo cu mita aña a pasa, Servicio di Impuesto lo bay evalua con lo para cu e asunto di sticker. Loke por a ripara ta cu e publico of mayoria di e clientenan a compronde e sistema di sticker. Sinembargo ta haya si un grupo cu kisas no a compronde mucho bon. Esey ta riparabel riba caya. Por ehempel por a ripara cu e sticker a wordo pega riba e windshield, of memey of banda robes. Ainda ta haya cu hendenan no a kita nan tint pa pega e sticker na e parti cu tin cu wordo pega. Esey tambe a ripara.
Pa e parti administrativo a ripara cu hopi cliente ta acudi na Servicio di Impuesto pa haya un otro sticker bisando cu nan a perde esaki. Na prome instante pa Servicio di Impuesto ta straño pasobra si plak e sticker na e windshield banda paden, ta dificil pa perde. Pero parce cu mas bien ta clientenan cu ora nan a paga nan belasting, nan lo a pone den lachi di auto of un caminda cu e sticker por a perde. Esey lo por a sosode. E clientenan ey, ora nan bin pidi un sticker, ta duna nan un otro sticker. Nan tin cu paga 30 florin pa nan por ricibi uno y ta haya un comprobante ki number di sticker e ta, segun Meverly Romano.
