Ayera e parlamentonan di Corsou, St. Maarten y Aruba a a discuti riba cierto temanan comun caba, mientras awe e parlamento di Hulanda ta join pa asina e reunion di IPKO oficialmente ta cuminsa awe.

Den e reunion ayera entre e tres parlamentonan dos resolucion a wordo adopta cual uno tabata referente na derecho pa por presenta concepto di leynan di Reino anto e otro na e ‘geschillenregeling’. A papia tambe e tema di servicio di ferry entre Aruba,  Corsou y Boneiro como tambe mehoracion di servicio di conexion aereo. E ultimo ta importante como cu tin un aerolinea so, esta InselAir, cu ta resta riba e ruta, anto e compania aki tampoco ta den un situacion financiero mucho positivo.

Ferry
Tin un desaroyo nobo pa locual ta proposicion di servicio di ferry entre islanan segun informacion di parlamentario Andin Bikker (PDR). E ta un di e motor tras di e proyecto di ferry. Corsou cu Hulanda a sigui traha riba e proyecto anto ta bay bin un pilot entre Corsou cu Bonaire. Segun sr. Bikker: “Na Aruba mi ta kere door cu tabata tin e iniciativa priva di Venezuela – cu eigenlijk no tabata vision di ningun parlamento – Aruba a wanta riba esaki. Awo cu tin un desaroyo nobo eynan y esun di Venezuela a bay ofrece servicio na isla di Margarita, Aruba ta bon bini pa participa den e iniciativa di ferry entre islanan ABC. ” Gobierno di Corsou a caba di forma pues nan mester ainda busca mas informacion riba esaki segun sr. Bikker.

IPKO
Awe mainta Parlamento di Aruba ta reuni cu Parlamentonan di Corsou, St. Maarten y Hulanda pa inicia e Interparlementair Overleg Koninkrijksrelaties (IPKO). E reunionnan aki ta bay tuma luga desde awe 10 te cu 13 di januari. Temanan cu lo ser trata ta entre otro Geschillenregeling, nombramento di gobernador, oportunidadnan economico, cambio di clima y energia, Reino ideal 2040, presentacion di proyectonan di waf, integridad den gobernacion, hof Constitucional, y salubridad. Ademas segun Presidente di Parlamento di Aruba, lo haya un presentacion y bishita e proyecto Oostpunt.  Segun presidente di Staten di Aruba, Mervin Wyatt Ras (AVP): “Mi ta considera e reunionnan importante pero mas importante ainda cu ta ser cumpli cu palabracionnan.”  Por bisa tin cambio di constelacion di parlamentonan den Reino, sin embargo esakinan no mester haci cu ta lubida palabracionnan haci, segun sra. Wyatt-Ras.  E ta haya cu e aspecto di respet tambe ta di importancia pa nos por continua cu reunionnan.

Relacion cu Reino por miho
Segun vice presidente di Parlamento di Aruba, Rene Herdé (AVP): “Nos a conclui cu e relacion y cooperacion economico por hopi miho. Y pa haci esey mas concreto anto mas dirigi, nos a sugeri y bay di acuerdo pa inicia un investigacion riba e posibilidadnan economico entre nos tres paisnan.” Sr. Herdé ta splica Bon Dia Aruba cu un di e cosnan cu a bini den discusion ayera tambe tabata e problema cu nos companianan di aviacion ta haya. Segun informacion di sr. Bikker, a wordo discuti ayera con gobierno di Corsou a duna sosten financiero na InselAir. Esaki pues tabata pa mantene e servicio y garantisa cu e no ta cay afo.

Geschillenregeling/areglo di conflicto
Otro tema tabata tambe asunto di nos studiantenan y e sumanan cu nan tin cu paga bek despues di haci fiansa na Hulanda.  Pa loke ta asuntonan di Reino, a wordo discuti tambe e relacionnan di ultimo tempo. Segun sr. Herdé: “Den e prome resolucion nos ta urgi Reino atrobe pa haci tur lo posibel pa nos por trata un areglo di conflicto den Parlamento Hulandes.” Un ley, e ta agrega, cu ta regla posibilidad pa un conflicto no bira un problema grandi. “E idea ta pa pues tin un organo/instancia imparcial cu lo por dicta veredicto manera un corte.” Sr.  Herdé ta bisa cu nan tin 7 aña trahando riba esaki anto a wordo palabra den IPKO caba con e areglo aki mester ta. E ta sigui bisa cu: “Aruba, Corsou y St. Maarten a tuma e iniciativa di presenta un proposicion. Gobierno di Reino tambe a presenta un proposicion. Awor nos kier pa nan wordo trata den parlamento mas lihe posibel.”  E intencion ta pa haci esaki prome cu eleccion na Hulanda den luna di maart. Esaki a bira hopi mas dificil segun sr. Herdé sin embargo, nan a urgi nan pa haci esey.

Derecho di iniciativa
E otro tema cu a wordo trata cu tin di haber cu relacionnan den Reino, ta e proposicion pa Parlamentonan di Aruba, Corsou y St.Maarten tambe por entrega iniciativanan di ley cu ta regla asuntonan den Reino. Te aworaki parlamentarionan Hulandes, partidonan Hulandes  y Minister Plenipotenciario so por haci esey. Cu e proposicion aki awo parlamentonan tambe por tuma e iniciativa.  “E areglo di conflicto y posibilidad di iniciativa ta haci cu ora tin un diferencia di opinion, nos lo por apela por ehempel na un corte pa regla esey. Of nos por entrega proposicionnan di ley cu ta regla loke nos ta haya necesario.” Sr. Herdé ta conclui: “Cu esey nos ta preveni mas ainda posibel conflictonan entre nos y poco poco elimina deficitnan democratico cu ta existi den  structura di nos gobernacion di Reino.” Riba e proposicion (di sr Bikker) pa haya derecho di iniciativa e organo di consulta constitucional di Hulanda, Raad van State ya a duna su conseho unda cu minister di Reino, Ronald Plasterk, tambe a comenta. E minister mes no ta mira ta necesario pa duna parlamentarionan individual di Aruba (esaki ta e proposicion di sr. Bikker) e derecho di bin cu proposicionnan di ley, siguiendo e conseho di Raad van State. Pero e organo si a conseha cu ta posibel pa duna e parlamentonan completo di Aruba (y di e otro paisnan Caribense) e derecho di iniciativa den Tweede Kamer, esta parlamento Hulandes.

Sinembargo minister di Reino Plasterk ta bisa cu e no ta mira cu esaki ta necesario como cu e islanan mes ya tin e posibilidad caba pa entre e conceptonan di ley por medio di nan minister Plenipotenciario. Y cu e islanan mes no ta haci mucho uzo mes awor di e oportunidad existente aki. Sinembargo sr Bikker ta bula pa Hulanda despues e siman di IPKO pa asina convence cu ta necesario pa nos parlamento (y awor e otro parlamentonan tambe ta sostene e idea aki) pa amplia e posibilidad pa por entrega leynan den Tweede Kamer.