Ayera mainta a tuma luga un conferencia di prensa di Serlimar pa trece dilanti e situacion di e dump na Parkietenbos, como tambe na Ser’i Teishi.

Henley Davelaar, director di Serlimar a splica cu loke ta bin sucediendo na Parkietenbos y Ser’i Teishi ta algo cu nan mes a tuma e decision, esta di laga expertonan ariba e terenonan aki duna ayudo. Ta trata un compania di Spaña cu tin filial na Colombia, cu a bin haci un investigacion na Ser’i Teishi y na e momentonan aki ta studiando e resultado.

Cu e resultado lo mester traha un rapport pa wak con por coregi of remedia tur loke tin aworaki riba termino largo. Tambe Davelaar a expresa cu e situacion awor na Ser’i Teishi ta hopi bon controla; aunke siman pasa el a haya un pregunta di kico ta pasando den barionan cerca e dump cu ta hayando holo y huma. El a declara cu esey a bin for di un otro compania cu ta separa e sushi pa nan specificamente. E compania tin un tereno patras unda ta pone loke ta separa y esey tabata na candela pa dos dia di siman pasa, cu tabata diasabra y diadomingo.

Davelaar a bisa cu nan tin un plan integral riba mesa cu tin cu yega na ceramento di Parkietenbos y tambe e solucion temporal, cu ta Ser’i Teishi. Tin tres destaho cu a tuma luga, uno pa remediacion di Parkietenbos, otro pa ‘Solid Waste Treatment Facility’ (SWTF) y otro pa e sanitary landfill. Asina mes el a sigura cu ta hopi importante e proyecto di cambio di ley di Serlimar, pa motibo cu e ta duna balor na tur tres destaho aki, pa por yega na un solucion a largo plaso.

Davelaar a informa cu pa dia 1 di februari e ‘small scale incinerator’ lo drenta den funcion di forma definitivo y aki lo haci e proceso di kima sludge, desperdicio medico y cadaver principalmente. Pero tambe documentonan confidencial y productonan cu a caduca. El a menciona cu esaki lo caba cu henter un era di kimamento di desperdicio medico, cadaver y tambe slodge den aire liber, pa cual pa añanan largo e bisindario tabata sufri.

Te awo, Davelaar a comenta cu ta kima tur luna greenwaste. Tin contacto cu Meteo Aruba, pa haya sa si biento no ta faborabel pa nan no kima e dia ey, y nan ta warda te ora biento ta faborabel pa haci esey.

Michael Rasmijn, hefe di operacion di Serlimar, a trece dilanti cu desde comienso di januari 2018 nan a wordo notifica cu e enviromental bales mester bay na otro luga, cu ta Ser’i Teishi. Prome cu esey tabatin otro luga cu tin e mesun problema, un di nan ta na Noord cu ta ubica den un tereno priva.

Na Ser’i Teishi tempo cu Serlimar a haya luga, nan a haya 1.500 environmental bales cu tabata poni caba. El a comenta cu nan tarea desde comienso tabata pa tapa e bales mas lihe posibel pa evita holo y huma. El a bisa cu esey den prome aña a bay hopi bon, pero na caminda, na prome luna di 2019 a cuminsa sali holo y saca huma sin cu nan por duna splicacion di e problema.

P’esey desde mita di 2019 nan a cuminsa haci otro prueba na unda e bales tabata traha y e motibo pa kico e huma y holo. Te aworaki nan ta bezig cu e parti ey hunto cu e compania di Spaña.

Di mesun manera, el a declara cu e parti mas dificil ta pa coba y crea espacio pa sigui pone e bales na Se’ri Teishi. Rasmijn a bisa cu nan ta yegando na 100.000 ton di sushi den bales, y na Parkietenbos na 2019 e desperdicio tabata yega na 6.000 ton pa luna. P’esey Serlimar ta zorg pa Parkietenbos ta bon controla, pero Ser’i Teishi tambe.