Serlimar t’ey pa keda… No ta bisa con…

Gobierno, den persona di nos ministro encarga cu Transporte, Integridad, Naturaleza y Asunto di Adulto Mayor, a trece e grato noticia cu Serlimar lo sigui existi. Contento di tende esey, pero den tur loke a sali publica, nos no a tende tanto di con ta bay haci pa e compania ta en berdad rentable. Na promer lugar lo ta necesario pa crea un situacion tal cu e compania tin un perspectiva creible pa huez por tuma e decision cu tin cierto garantia cu e compania di awor en adelante por produci suficiente entrada pa caba di paga su debenan y, importante, tin un base solido cu ta brinda e probabilidad cu e compania por opera normal, pagando tur su gastonan y por reserva recurso pa haci e inversionnan necesario, cu miras pa futuro. Bisando esey, ya tin varios interogante ta surgi, riba cual e anuncio di e ministro no a duna contesta.

Pa cuminza e problema mayor cu Serlimar tin cu su acreedornan, ta hustamente cu gobierno mes. Mayor parti di e debe na momento cu a pidi e surseance van betaling tabata impuesto y prima atrasa, cu sin embargo mester paga. Nos ta comprende cu gobierno ta bisa cu no ta bay haci excepcion den esaki. Hopi hende lo haya esaki por lo menos un poco peculiar, pasobra gobierno no ta solamente acreedor principal, pero ta den cierto forma e propietario di e compania. Ademas ta gobierno a constitui e entidad como un sui generis, pa no mester a bay den un NV por ehemplo, loke lo a pone gobierno den e posicion di accionista – unico ademas – loke lo a haci cu gobierno no por a haci tanto wega cu e compania. Asina ta cu e entidad a nace bao di un luz un poco straño caba, pero tanto aña despues, e ta loke e ta.

E problemanan no a keda ey, pasobra loke di inicio no a regla bon, ta contestando e pregunta di kico realmente Serlimar mester biba? Ningun compania no por sobrevivi, si bo ta den e situacion unico cu bo tin cliente cu no ta paga… Esaki ta un di e aspectonan clave di cual nos no a tende ni un silaba den relato di e encuentro reciente. E asunto ta masha simple: ora bo tin miles di cliente, cu mester paga un suma chikito pa luna, ta bira practicamente imposible pa core tras di nan pa nan paga, si bo no tin un instrumento di poder pa obliga nan. No ta pornada empresa manera WEB o Elmar ta corta servicio ora un persona no ta paga su cuenta. Y como cu awa y coriente ta bastante esencial pa nos tur, bo ta obliga di paga y na tempo. Servicio di telecomunicacion ta cay den mesun categoria: bo no ta paga, bo no tin servicio mas.

Awor, pakico nunca ta haya contesta riba e pregunta pakico no ta crea un situacion di poder pa Serlimar, cu ta haci cu e compania por cobra sin problema? Bo no por hacie nengando servicio, pasobra e ora nos ta crea un problema di desperdicio benta tur caminda. Na otro pais ta resolve esaki via por ehemplo cobranza di e suma pa e compania via cuenta di awa o coriente. Nos no ta comprende pakico aki no ta haci esey. E lo significa cu bo no por keda sin paga, pasobra e ora bo lo keda sin haya awa o coriente. Y si acaso pa algun motibo – desconoci pa nos – gobierno no kier regla esey, kico anto ta nan contesta na publico, y na e huez den e caso di surseance van betaling, con e compania lo tin un base financiero solido, si e ta e unico compania cu cliente cu no ta paga. Si huez no a haci e pregunta ey ainda, ta bira tempo anto…

Pero, con a haci tur e tempo pa e compania sobrevivi? Esey ta facil: parlamento ta vota tur aña pa cubri e deficit cu e compania tin. Bon, esey parcialmente ta berdad, pasobra e compania tabata asina bon maneha, cu ni gobierno nan no tabata paga… Y a proposito, ta te recien a cuminza cumpli cu un maneho adecuado financiero, incluyendo produccion di cuenta anual. En todo caso, nos mester cuminza sospecha cu parti di e influencia politico den e compania tabata hustamente cu tabatin e gerencia y e hunta di supervision colga na hilo di marioneta, unda nan mester bay lobby cerca esnan den poder pa haya subsidio pa por cera aña. No cu esey a logra, pasobra e apreciable parlamentarionan tabata vota, cu probablemente un sentimento bon den nan curazon, pa un deficit cu no tabata conta e berdadero situacion di e compania. Y asina nos a yega na e situacion unda e mandatario di e momento ey a dicidi di pidi corte e surseance. Esey a bira un di e factornan cu a conduci na su retiro como mandatario, pero te awe ainda no tin un claridad ta kico gobierno ta haci pa resolve e problema, unda di un banda nan ta doño, y di otro banda acreedor.

Ta bunita pa tene encuentro cu e empleadonan y bisa nan cu tur cos lo keda resolvi, pero e anuncio ey tabata dirigi na publico tambe, y como medio ta nos responsabilidad pa puntra mas den detaye kico lo ta e base empresarial solido pa Serlimar, pa realmente nos por kere esey. Caso contrario, e wega politico tur aña cu subsidio no ta bay caba…