Durante un conferencia di prensa ayera mainta Jermaro Emerencia, PR & Marketing Manager di Serlimar, a anuncia nan servicio durante temporada di campamento y a duna tambe informacion tocante nan servicio en general.

Emerencia a anuncia primeramente cu temporada di campamento ta yegando, Serlimar tin un special pa full e temporada aki, for di 10 di april te cu 24 di april, cu ta 10 florin pa bari.

Apart di esey Emerencia kier a recorda na tur su clientenan cu for di februari Serlimar a cuminsa recoge barinan di clientenan cu a cuminsa ahusta na e barinan cu nan mester pa cas. El a splica cu nan ta riparando cu tin hende cu a entrega un bari y a keda cu un so, pero toch tur siman nan tin e bari yen di sushi mas dos saco sushi poni pafo.

“Nos ta pensa cu si bo ta acumula mas sushi cu e un solo bari, e ora dos bari ta necesario pa bo cas pasobra esey ta loke bo ta acumula. Serlimar no ta piki e dos saconan di sushi cu tin na banda di e bari, tur sushi mester ta den e bari”, Emerencia a aclara.

El a splica cu nan ta ricibi yamadanan cu keho di parti di clientenan cu ta bisa cu nan no a piki e sushi of cu e trahadonan a lubida di bay cu e saconan pafo di e bari. El a enfatisa cu nan no ta recoge e saconan di sushi cu ta na banda, tur saco di sushi mester ta den e bari. “Si bo tin dos bari nos ta conseha pa por fabor keda cu e dos barinan y keda cu esaki den nos sistema na Serlimar”, el a agrega

Emerencia a subraya cu tin hende cu en berdad tabatin dos bari, pero nan ta acumula un bari so di sushi pa siman. Pero tin hende cu aworaki a cambia pa un bari so, por ta pa bay mas barata, pero tur siman nan tin un bari di sushi plus dos of tres saco di sushi tira na banda. “Si bo cas ta acumula mas cu un bari busca dos y e servicio ta keda normal”.

Pa loke ta trata e tema di e kitamento di barinan, el a indica cu nan ta hayando basta keho di parti di clientenan cu no a haci pago y nan ta den proceso di kita e barinan aki. Pero e motibo valido, manera Emerencia a señala, pa esaki ta cu e cliente no a paga 2019, no a paga 2020 y no a paga 2021 tampoco y asina obviamente nan ta pasa over na proceso di recoge e barinan sushi na e casnan.

Na mesun momento el a menciona cu si esaki a pasa cu un cliente, nan por pasa na oficina y nan ta ofrece areglo di pago, tin sistema di pago online tambe y dependiendo di e situacion y suma, Serlimar por bay te na cas y cobra na cas.

Kedando den e tema di pago, Emerencia a pone enfasis ariba articulo 8 pasobra, segun el a splica, nan ta haya clientenan cu ta cuestiona e proceso di cobransa. “articulo 8 semper a bisa cu nos tin cu ofrece un servicio, bo tin un obligacion di paga pa e servicio y si bo no paga pe, e ora nos tin e derecho di cancela e servicio”, el a señala.

Cu cancelacion di servicio kiermen cu Serlimar ta kita e bari di sushi, manera cu nan a bin ta haciendo desde februari pa falta di pago, y no lo pasa recoge sushi na e cas mas. El a bolbe subraya cu Serlimar tin beleid cu nan no ta recoge niun saco di sushi pafo di un cas. E persona mester tin un bari of un container pa Serlimar por recoge esaki. Serlimar ta recoge solamente sushi for di barinan cu ta di Serlimar so.

Emerencia a recorda e clientenan tambe cu manera tur aña pa dianan di fiesta e ruta di recogemento di sushi ta cambia. Ora ta dianan di fiesta e programa di e siman ta schuif pa un dia prome of un dia despues. Pa loke ta trata e siman cu ta biniendo di diabierna santo e cambio di ruta ta cu dialuna ta schuif bay riba diadomingo y e resto di siman ta schuif pa un dia prome.

Tin caminda cu no tin bari di sushi y tin hopi sushi riba caya cu ta afecta e bario y hendenan cu si ta paga pa e servicio di recogemento di sushi. Pa situacionnan asina Emerencia a splica cu Serlimar ta ofrece servicio di mantencion pa bario cual ta encera haci e barionan limpi, e stupinan y dumpnan ilegal. E notificacionnan aki ta drenta e-mail of helpdesk, Serlimar ta pasa revisa e area y asina despues nan ta pasa haci e barionan limpi.

Tin hopi situacion caminda cu e clientenan no ta pone e sushi, vooral cuminda, den un saco di sushi. Emerencia a indica cu Serlimar tin un beleid cu ta bisa cu e sushi mester ta den un saco di sushi. El a remarca cu nan tin añas ta bisa esaki, pero toch tin situacionnan na unda cu e bari ta yena cu tres of cuater saco pero tin cuminda los den dje tambe.

“E no ta agradabel pa e trahado cu ta piki e sushi ora cu nan bolter e bari y cos dal den nan. Ta kehonan cu nos ta haya tur ora. P’esey nos ta recorda tur cliente pa por fabor keda pone e sushi den un saco pa asina ora nan bira e bari nada no ta bula bay niun caminda”, el a agrega.