Gobierno a traves di ministro encarga cu Finanzas, a manda un notificacion pa parlamento siman pasa, unda ta indica cu e situacion financiero di Serlimar ta rekeri un inyeccion extra di Afl. 800.000 pa e aña aki, cual lo ser añadi na e presupuesto complementario 2019 den forma di un ‘Nota van Wijziging’.
Segun informacion di e mandatario encarga cu finanzas na prome instante lo a bin di presupuesto pa ministerio di Transport, Comunicacion y Sector primario, pero despues e ministro a laga sa, den un carta di 13 di december, cu riba su propio presupuesto di Finanzas lo tin suficiente cobertura pa e gasto extra aki.
Segun nos informacion e fraccionnan gubernamental den reunion di Centrale Commissie a bay di acuerdo diahuebs pasa caba cu e gasto urgente aki, cu lo ta pa un gran parti en todo caso pa paga salario di e personal di e entidad aki.
Segun varios observador e fondonan extra a bira necesario pasobra e cambio di ley di Serlimar no a logra aprobacion den parlamento, cu consecuencia cu e aumento planea di entrada di Serlimar no por a tuma lugar.
Nota di redaccion: na fin di september ainda tabatin nota un deficit anticipa di Serlimar di Afl. 5.078.800 loke a resulta insuficiente.
