Pa rasonnan cu tanto e vocero mes como Serlimar no ta dispuesto pa aclaria ainda, Twyma van der Biezen a tuma retiro di su funcion como manager di benta y mercadeo. Sinembargo e compania ta desmenti cu e vocero su retiro lo ta relaciona cu metemento politico den e compania su operacion.
Ayera atardi Serlimar a tene un conferencia di prensa tocando e asunto aki, unda e compania ta desmenti e rumornan cu a aparece den cierto portalnan di noticia y riba medionan social, den cual ta relaciona van der Biezen su retiro cu cultura organisatorio di Serlimar y cualkier tipo di metemento politico den e Sui Generis.
Director di e compania Henley Davelaar a declara despues di pregunta di Bon Dia, cu e compania no a ricibi un motivacion pa van der Biezen su retiro den e carta cu el a entrega. Sinembargo, den un reaccion cortico na Bon Dia e vocero, cual lo oficialmente baha for di su posicion entrante 9 di augustus, a bisa cu Serlimar ta na altura di e rasonnan pa cual e ta retirando. ‘Pero esaki no ta refleha den mi carta’, van der Biezen a bisa. Mas leu cu esey van der Biezen no tabata dispuesto pa bisa, declarando cu e no ta duna comentario actualmente.
Mientrastanto Serlimar ta conta riba apoyo di otro coleganan cu lo bay ehecuta e trabounan relaciona cu e funcion temporalmente te cu bin cu un solucion. Den ki direccion e compania ta bayendo no ta conoci ainda, Davelaar a bisa, ‘te awo ta mucho tempran pa bisa cua paso nos lo tuma’. Van der Biezen su decision ta cay net na un momento crucial unda Serlimar ta ricibiendo containernan nobo, a caba di lanta su Upcyle Center y tin su asuntonan diario pa atende cune.
