Serlimar ta contento con sistema di cobramento ta bay, Pero ainda hopi hende no a paga

Unabes cu Serlimar a cuminsa cobra pa e servicio di recogemento di sushi na domicilio, e proceso di pagamento  di parti di e clientenan no a bay shen porciento ainda.

Vocero di Serlimar sr. Lionel Croes a declara na Bon Dia Aruba cu no obstante tur dia Serlimar ta hayando un cantidad substancial di clientenan cu ta bin paga, ya sea na oficina di gobierno of via banco mes pa medio di transferencia online. Tambe esunnan cu ta bin personalmente na Serlimar su sucursal na Paradera  y tambe na San Nicolas pa bay paga pa e servicio.

Ya caba el a anuncia cu e recibonan nobo cu e cobransa di 2016 a sali, y pronto nan lo wordo despacha. El a bisa cu tin alrededor di 17 pa 18 mil recibo caba cu ta na Postkantoor cu den e dianan venidero nan lo bay wordo reparti na e adresnan existente na Serlimar.

Cobramento

Serlimar ta contento con e sistema di cobramento ta bay. “Hopi mes, tremendo, increibel con e hendenan ta pagando… Den poco palabra  nos ta hopi contento”, el a bisa.   

No obstante cu e sindicalista Rudy Geerman a hiba un campaña contra no paga Serlimar. Vocero di Serlimar a bisa cu e campaña di sr. Geerman tabatin su efecto negativo pa e compania, caminda berdaderamente hopi hende a keda confundi  pa bay paga si of no. Ainda e cantidad di hendenan cu no a paga ta hopi. Mester tene cuenta tambe cu tin famia di menos recurso, personanan cu ta bibando di onderstand di gobierno y cu Serlimar ta abstene di cobra nan.

Esun cu ainda no a paga 2015, el a bisa cu Serlimar ta flexibel y nan ta ofrece un forma di pago comodo na alcance di cada cliente, y tambe ta ofrece e pakete paga pa 2016. Esunnan cu ainda no a paga, Serlimar kier curasha nan pa inverti den un compania Serlimar Sui Generis cu a demostra cu por brinda mas cu 40 mil cas servicio residencial di piki sushi. 

El a indica cu Serlimar tin tur e confiansa, ya cu e pueblo a mira un adelanto den e servicio su calidad y mehoracion. E mehoracion aki –segun vocero di Serlimar- no tin di haber exclusivamente cu e servicio di piki sushi na domicilio sino riba e sector comercial tambe. El a bisa cu nan a mira un crecemento di 173.7%  compara cu aña anterior. Tambe den e ultimo tres aña y mey, Serlimar ta bayendo den un bon direccion.     

El a trece dilanti cu e introduccion di e cobramento pa e servicio di recoge sushi na domicilio ta a base di un ley cu a pasa den Parlamento no awor sino na aña 2005. Pero e tempo aya Serlimar no a ehecuta e ley  pasobra  Serlimar no tabata cla pa brinda e servicio manera pueblo tabata spera di nan.

Servicio y calidad

Sinembargo e ta reconoce cu no obstante ainda nan tin un buraco caminda ta falta informacion, ya cu tin hopi cas cu a wordo construi y cu ainda Serlimar no tin e datonan.  Pero den su gran totalidad nan ta conta cu informacion.  Nan tin un team masha activo cu ta riba caya  pa anota tur e casnan ainda no ta registra y asina nan ta purba di compila informacion.

Tin cas nobo cu ainda no a wordo registra den nan sistema,  y p’esey nan ta trahando  pa lansa nan website nobo y asina online e cliente lo por haci nan registracion via un number di cliente. Of nan por bin personalmente  cu nan recibo  di awa of di coriente hunto cu un identificacion pa registra como cliente na Serlimar.  Tambe tin hopi hende  cu tin apartamento  of cu ta huur y cu Serlimar mester bay cobra nan pa e servicio di pikimento di sushi den  nan parcela.

Sr. Croes  a bisa cu Serlimar ta bin trahando pa mehora su servicio y cambia e mentalidad di su trahadonan. Ainda nan tin espacio pa sigui mehora,  pero nan ta trahando riba calidad di servicio tanto asina cu nan a haci inversionnan grandi. Te hasta  nan a traha un departamento  nobo di calidad cu ta monitor e servicio y tambe nan ta atende cu tur keho.