Trahadonan di Serlimar a tuma back nan trabao, y ta bolbe recoge sushi. Representantenan di e sindicatonan a logra convence minister di Medio Ambiente, Ursell Arends (RAIZ) di e necesidad pa ayudo financiero, segun un relato den website noticiero, Aruba.nu.
Manera Bon Dia Aruba a reporta, e personal di Serlimar a dicidi di pone nan trabao plat durante dos dia, pa motibo cu nan ta exigi nan derechonan. Riba diamars mainta nan a lock e porta cu un candal pa asina evita entrada y salida di otro trahadonan. Segun trahadonan, tin cosnan cu ta pasando den Serlimar cu nan no por acepta mas. Por ehemplo cu nan no tin un Raad van toezicht completo, sino cu ta conforma di un persona so; for di aña 2018 nan no ta hayando uniform; ademas nan a sigura cu e placa di 12,6% cu ta supone di bay pa FASE, e ta bayendo pa paga debe di Serlimar.
Posicion financiero di Serlimar pa hopi tempo ta uno precario. Den pasado, gobierno tabata subsidia fuertemente e compania, pero pa motibo di e desaroyonan recien – principalmente door di pandemia – no por a conta cu e sosten aki mas y e compania mester busca pa su mes.
Mientras tanto, minister di Naturalesa, Ursell Arends a bisa website noticiero NoticiaCla cu el a haci un peticion pa alarga e actual surseance van betaling di Serlimar proximo februari pa asina e compania tin oportunidad pa sali for di e 20 miyon florin di debe den cual e ta actualmente. Arends a confirma na NoticiaCla cu el a yega na un acuerdo cu e trahadornan di Serlimar pa nan reanuda nan trabao for di ayera, despues di tres dia di accion.
Arends a indica cu te februari ta duna suficiente tempo pa por ‘rescata’ Serlimar. Pero el a indica cu tin ‘cos cu ami como minister mester atende cune’, cu segun NoticiaCla, ta encera nombramento di un presidente di Raad van Toezicht, loke no a sucede ainda, y tambe nombra miembronan kende lo nombra un director nobo pa e compania.
