Serlimar: No por pone cura ainda pasobra destino Parkietenbos no ta cla

Causa di e candela di ayera mainta na dump di Parkietenbos ta mustra di ta uno haci a proposito entre 5’or y 6’or di mainta. E candela a wordo cendi pa personanan desconoci na un area cu ta destina pa pone hero. Serlimar tin e problema aki pa hopi tempo caba y na varios ocasion a presenta posibel solucion cual ta construccion di un cura. Aparentemente e cura aki no t’ey ainda como cu futuro di Serlimar no ta fiha ainda pa gobierno.

“Serlimar tin un contract cu un compania maneha pa un Surnameño cu ta encarga cu e parti di hero. Anto e tin e contracto pues ta atende cu e parti di hero. Sinembargo for di aña pasa september no sa di e paradero di e persona aki. En todo caso e heronan aki a wordo cendi na candela cu mal intencion,” Sr. Lionel Croes a splica. Ainda tin hopi problema cu personanan sin permiso drentando for di otro area, sea ta pa coy koper entre otro. Manera cu a detecta e situacion a yama brandweer kende a wak e situacion y a prefera pa no page  di biaha pasobra ta hero, y ta mescos cu ta ‘tira awa den pos’, pues e no ta bale la pena. Brandweer a opta pa warda y laga esey sigui kima pa despues bay over na spuit. Sr. Lionel a agrega enfatisando cu e area cu a kima ta completamente di hero.

‘Menasa na varios ocasion’

A puntra Sr. Croes kico ta e chens pa e candela aki a cende su so manera sa ta e caso na otro areanan di dump, el a splica cu esey ta hopi dificil den e area aki como cu caminda e heronan ta ya pa hopi aña a wordo haci limpi y traha di tal forma cu tin separacion di hero solamente. E area ta plat, buraco a wordo haci abou y ta un area di trabou cu tur articulo di hero ta wordo poni. Serlimar ta separa sushi na dump segun Sr. Croes algo cu nan no ta promove den comunidad, pero ta separa carton, koper, hero, autonan etc. Cu esaki bisa e ta splica cu e area aki no ta na peliger pa loke ta candela. Den pasado e area di taira a wordo cendi intencionalmente na varios ocasion y na e area mas dilanti si ta mira semper cu tin huma ta sali como cu eybou tin candela. “Na varios ocasion tambe ora cu ta kita hende for di riba e tereno, nan ta menasa tambe cu nan ta cende e luga na candela.”

Accesibilidad

Dump mes no ta accesibel pa hende, tin tur e baricadanan y siguridad. Hende cu ta bay tira sushi ta haci esaki riba e PTS unda cu tin diferente baki pa tira sushi den rij, y Empleadonan di Serlimar mes ta piki e sushinan aki y hiba dump, pa no haya ken cu ta subi dump tira sushi aki aya, cual ta pone dump mas na peliger pa cende candela. “Nos tin un team special cu ta coy e bakinan hala otro caminda unda cu e sushi ta wordo procesa, pa asina e daño ta bira minimo.”

Awo cu tin e informacion cu e candela a wordo cendi intencionalmente y cu den pasado esaki tambe a mustra di a tuma luga, a puntra Sr. Croes kico mas por wordo haci apart di siguridad 24ora pa evita cu personanan desconoci por haci algo asina. Den pasado a hasta papia di lanta un cura pero te ainda no a mira ni tende nada mas. El a bisa cu tur e areanan cu ta bin fei parti di lama/mangrove no ta cera y berdad sa haya personanan ta subi di e banda ey. Tambe tin choller cu tabata biba eyriba, a pone camara den pasado cu a wordo horta “van alles en nog wat” ta pasa eyriba. Esakinan ta parti di motibonan cu Serlimar a pensa pa pone un cura pero e proceso ta tardando. Ta wardando riba e decision di gobierno pa loke ta futuro di Parkietenbos. Tambe pa pone e cura diferente accion mester tuma luga unda cu ta analisa e material cu lo lanta e cura cun’e, limpiesa, con sigur esaki ta entre otro. E situacion tin atencion di gerencia segun Sr. Croes y tin un manager na Parkietenbos actualmente cu mester presenta cu un plan pe miho solucion den e proximo siman cu ta bin, Sr. Croes a bisa.

Solucion mester bin pronto pasobra e dump ta keda subi, ta keda tapa esaki cu santo pero e candela cu tin bou di dump mes dificil pa domina. Kiermen tanten cu no bin cu un sistema di gobierno unda cu ta bay procesa e desperdicio, ta bay keda cu e problema aki, p’esey tin candela tur luna riba dump. Esaki ya ta e di dos candela di e aña aki, cual e biaha aki ta basta grandi y December ultimo tabatin un grandi na e seccion di taira. Di parti gobierno mes ainda no tin un plan fiho riba e futuro di Parkietenbos Serlimar. Cada gobierno tin un otro agenda y e maneho cu tin Serlimar mester sigui, Sr. Croes a termina bisando.

Contexto

Ta casi un aña pasa (februari 2015) cu Minister Mike de Meza encarga cu medio ambiente a bisa cu lo bin solucion pa e candela riba dump na Parkietenbos. EL a bis cu lo sigui cu e proceso pa cera un acuerdo cu Ecogas, pa kima sushi pa traha gas cun’e. Na e ocasion ey el a expres preocupacion caba cu tin hende cu ta cende candela riba dump, pero nunca ta wordo gara cometiendo e acto, pues nan no ta wordo castiga pa e acto.

Na januari Serlimar a presenta cambionan pa 2016 unda cu a pone cu lo ta atendiendo cu e problema di candela riba dump tambe cual segun nan ta trece desbalansa den nan esfuersonan pa cuida medio ambiente. Den e comunicado ey nan a bisa cu no tin un solucion 100% ainda pa e candela riba dump cu no ta wordo cendi intencionalmente y cu ta maniobra pa minimalisa esaki.