Awe pa 9or di mainta, Parlamento ta sigui trata e asina yama Ley di Serlimar. Ta wordo premira cu e ta bira cu reunion publico crucial, unda lo wordo determina e futuro di e ley aki, ya sea cu e lo wordo aproba si of no. Of si e lo conoce varios cambio -segun amiendanan presenta- cu lo haci cu e ley lo ta otro for di e concepto original y cambionan cu Minister Otmar Oduber a introduci den dje.

Ya caba for di e fraccion den coalicion di MEP ta wordo premira cu lo bin cu mas cambio riba e ley controversial aki. Pero tampoco por bisa si tur nan miembronan di fraccion lo duna vota na fabor di e ley aki.

Fraccion MEP.
Ayera Parlamentario di MEP, Endy Croes a referi na e tratamento di e ley aki. Nan lo continua cu tur e oradonan di e segundo buelta, caminda e minister en cuestion tin cu contesta tur cos. Na final di e reunion nan ta premira cu lo tin notanan di cambio di parti di e mandatario, pero tambe amiendanan cu ta bin di Parlamento.

Croes ta spera cu di parti di e fraccion di MEP nan por carga e ley aki. E no por bisa si ta existi un consenso den seno di su fraccion pa aproba e ley aki. Croes a agrega cu cada parlamentario na final di dia tin cu ‘para responsabel y ta husga pa su mes.’

Den e caso di e ley di Serlimar, fraccion di MEP tabatin hopi debate interno entre nan mes, pero cu stakeholdernan y tambe cu e comision cu ta representa e habitante di Simeon Antonio y bisindario. E ta haya cu den un fraccion bo por como parlamentario vocifera bo opinion independientemente. Nan sa cu tin parlamentarionan cu nan diferencia di opinion tocante e ley aki.

Amienda.
Durante e ultimo dianan te hasta den weekend nan a yega di traha riba tur e cambionan. Ayera tardi traimerdia nan a presenta e cambionan aki na tur e miembronan di e fraccion aki, pero di e coalicion tambe. Nan ta spera cu despues di tur e cambionan aki, nan tur por sinti cu nan por sostene e ley aki unanimamente. Nan tin huristanan cu a yuda nan pa trece un ‘producto final.’

Croes ta reconoce cu di e forma cu nan a ricibi e ley y con e ta aworaki, nan a haci bastante cambio scuchando tur e stakeholdernan pa asina nan por yega na un ley hopi balansa. Bon Dia Aruba den su edicion di ayera a menciona algun di e cambionan cu a wordo haci na e ley aki. Pero un parti cu tabata un punto di basta discusion -prome cu e ley a wordo trata- tin di haci cu e proteccion riba e compania estatal creando casi un monopolio di dje.

Pero Croes a bisa cu e parti aki di exclusividad a wordo saca afo, y e lo bin riba amienda. Den e ley tabata para cu Serlimar lo ta esun exclusivo cu por haci tur e trabou. Pues den nan cambio a bin pa saca e palabra na Hulandes ‘enige’ for di e ley di Serlimar cu tabata esun cu tabata duna exclusividad na e compania estatal aki. Croes a declara cu e ley aki no a bin pa stroba niun compania di opera, y tur compania den e sector aki locual ta haci awe lo sigui haci’e igual.

Otro tin di haci cu e articulo 6C cu tin di haci cu incinerator grandi cu nan mes a pidi pa sak’e for di e ley, pa e no bira parti di e discusion. Minister Otmar Oduber a yega di bisa cu e ta dispuesto pa kita e articulo aki for di e ley tambe den e nota di cambio.

Tin un incinerator chikito cu ta wordo opera pa asunto di restonan biologico. Pero e asunto cu a genera mas controversia ta e proyecto di e incinerator grandi cu -segun Croes- lo wordo saca completamente for di e ley aki. “Pa kita tur e duda cu tabata existi,” el a bisa. E ta spera cu e cambio aki por trece cune cu mayoria di e Parlamento por vota pa e ley aki.

Dump na Parkietenbos.
E ley aki lo por bira un inicio di e proceso pa por sanea y cera e dump di Parkietenbos. El a referi na un rapport cu PAHO a yega di traha, unda ta para con e situacion peligroso di e dump ta pa salubridad publico.

E ta spera cu e ley aki por haya un aprobacion, pasobra hustamente e ley tin algun aspecto caminda tanto ciudadano, comercio y turista lo duna su aporte cu lo wordo destina den e maneho di sushi pa sanea y cera den fase e dump na Parkietenbos, y traha un landfill nobo organisa.

Pa loke ta e suma di 25 florin cu e ciudadano ta paga pa e servicio di recogemento di sushi pa luna tambe a yega di conoce cambio y el a wordo reparti di otro forma. Inicialmente e tabata 7.50 florin pa recoge y 17.50florin pa procesa. Despues di hopi discusion e suma di cada componente a cambia y e producto final ta: 15 florin pa recoge y 10 florin pa procesa.

Pues el a bisa cu nan lo lamenta hopi si e ley aki no lo pasa ya cu e tres componente pa genera placa no lo t’ey, y nan lo mester busca otro alternativa. Ya cu e espirito di e ley di Serlimar cu nan ta sigui delibera awe riba dje ta pa cera e dump di Parkietenbos y habri un sanitary landfill. Pero si no por logra e aprobacion di e ley, e dump lo keda den operacion, mientras cu nan lo por yega na otro alternativa pa por yega na un solucion.