Den ultimo dianan, tin persona ta keha cu na varios bario tin sushi rond di nan area. Serlimar a tuma e decision di habri Parkietenbos pa publico, pa asina tin menos sushedad rond Aruba, pero lo tin regla cu cual mester tene cuenta.
Director di Serlimar, Anko Koopmans a bisa cu lo cuminsa for di awe pa 7or di mainta te cu 4or di atardi. Parkietenbos lo ta habri e siguiente dianan cu e mesun orario. Tambe pa diasabra e lo ta habri di 8or di mainta pa 12or di merdia. Diadomingo ta cera.
Mirando cu a drenta peticion pa habri e localidad, pa motibo di sushedad rond di varios area, nan ta bay analisa con e situacion cana, pasobra nan no kier un cantidad di persona drenta Parkietenbos di biaha.
Lo mester tene cuenta cu tur regla y cu shelter in place ta sigui conta. “E no ta algo di un reunion of momento social paden.” Nan ta bay coordina cu tres auto so mag di drenta benta sushi afo, y ora nan caba, lo laga otro tres auto drenta pa cada beurt.
Segun Koopmans, lo ta e mesun situacion di ‘rij cu ta wak ora di busca gas’. Lo laga e auto para den rij, pero hende mester tin pasenshi pa e otro cu a bay tira su sushi afo. Sinembargo, pa e trucknan grandi lo mester subi Parkietenbos via ‘weeg brug’,
E tardansa lo depende di con lihe e auto ta haci su tarea di tira sushi, pero tur cos ta bay ta coordina, segun e ta splica. Di e forma ey, ta duna tur persona un chens pa tira nan sushi afo.
Un punto cu Koopmans ta recorda, ta pa hende tene na cuenta cu for di aña 2018 a saca un MB (ministeriële beschikking) cu no mag di trece ‘huishoudelijk afval’. Si topa cu esey den auto of den baki di pickup, no lo permiti pa drenta Parkietenbos.
E huishoudelijk afval ta e sushi cu Serlimar mes ta bin busca na cas, sea cuminda, sushi di baño of cushina. Pa motibo cu si tira e sushi aki den area di Parkietenbos por ocasiona candela, y mester preveni esaki.
Locual si nan ta tuma ta e grof vuil, cual ta desperdicio manera frishider bieu, wasmashin, bloki, tubo.
Tambe Koopmans a bisa cu e centro di reciclahe na Serlimar ta bezig cu pedido di aña pasa. Nan no ta colecta sushi sino material cu por wordo reusa. Asina nan habri bek nan lo laga pueblo sa pa entrega nan material. “E pikimento di sushi na cas ta keda normal. Si tin problema cu truck no a pasa busca sushi, por yama Serlimar pa nos encarga cu esaki.”
