Segun e comunicado di Serlimar, den cuadro di e asina yama ‘doorlichting’ nan cu ta tumando luga den diferente departamento, a conduci accion pa para cosnan cu ta bayendo robes.
Recientemente Serlimar a anuncia den un comunicado, cu tin un maneho nobo y den cuadro di esaki ta haciendo inventario di e containernan di sushi di 1100 liter. Robyn-Ann Didder, miembro di e team di maneho di Serlimar ta splica cu ‘e compania tin un servicio cu ta yama rent-me, cual ta un servicio cu bo por huur container di 1100 liter pa 1 dia, 2 dia of pa luna’.
A constata cu tin varios persona cu e containernan comercial aki na nan cas of na compania sin cu nan ta paga pa huur esaki. Consecuentemente, recientemente a base di e accion cu a inicia a tuma e libertad pa recoge tur e containernan aki bek. Den cuadro di e accion aki a constata tambe cu tin hende tabata paga pa e servicio, sinembargo e placa no tabata yega Serlimar, segun e comunicado.
Aparentemente empleadonan tabata huur esaki sin administra nan, cual investigacion ta andando pa haya sa kico exactamente a tuma luga.
Actualmente tin un afpakteam di container, cu ta bay busca tur e containernan aki. Ta haci suplica na comunidad, pa den caso cu bo tin un baki di 1100 liter y bo a cera un contracto y no ta haci pago of bo tin un di e bakinan aki y kier keda huur esaki, pa pasa na Serlimar y haci areglo di pago y asina e servicio lo sigui. Si no haci esaki y constata den e lista di inventario cu bo tin e baki y bo no ta pagando, Serlimar ta bin busca e baki bek na bo cas.
Sra. Didder ta enfatisa cu ‘esaki ta conta pa cas y negoshi, pasobra Serlimar ta un negoshi cu mester genera placa positivamente’.
Minister encarga cu Infrastructura y Medio Ambiente, Otmar Oduber a declara den e comunicado cu ‘e sosodenan aki ta inacceptabel y como un ministerio cu ta para pa integridad y transparencia lo no tolera e actonan aki’.
