Serlimar cu varios cambio pa 2016

Aña 2016 lo ta un aña cu Serlimar lo mira algun cambio, como tambe solucionnan pa varios di nan dilema cu nan a bin pasa aden den e ultimo temponan. Vocero di SuiGeniris, Lionel  Croes a indica, cu fuera cu pikimento di sushi lo conoce un aumento, nan ta trahando riba nan calidad di servicio, cual por cierto, segun Croes, a mehora enormemente.

Aumento significativo

Pikimento di sushi ta bin cu su gastonan, cual a haci cu Serlimar mester a haci un adaptacion di 25 cen pa luna pa loke ta 2016, haciendo esaki pa aña 3 florin. E tarifa awo pa aña a bira 315 florin, compara cu 312 florin pa loke ta 2015.

Mirando e prijs eyfo a aumenta, inversionnan cu a haci den ekiponan, Croes a bisa cu e aumento aki ta hustifica. Esaki ta cumpliendo cu ley, no surpasando un 10%. Serlimar ta un compania estatal, e tin cu brinda servicio, pero riba un prijs husto cu pueblo por paga y no kier abusa. E otro gastonan ta haci, nan ta haya otro caminda. E 25 cen ta significativo pa Serlimar pero esey no ta yuda pa cubri tur gasto. Ta hayando tambe suma den nan presupuesto for di gobierno, pero tambe di otro banda, nan ta creativo y a crea otro tipo di servicionan, cu ta trece inversion of placa pa Serlimar. E placa aki tambe ta bay bek den nos comunidad pa sigui mehora servicio y inverti tambe den e trucknan nobo cu nan ta buscando.

Servicionan extra

Pa loke ta servicionan extra, manera e parti comercial, principalmente huurmento di baki, pero pa e contractnan cu tin normal di 2013 – 2015 y 2016, prijsnan a keda mesun cos. E prijsnan comercial ta completamente otro compara cu esunnan residencial, nan ta mas halto.

Candela riba dump

Fuera di e cambionan cu Serlimar tin riba nan tarifa pa loke ta pikimento di sushi residencial, nan tin algun dolor di cabes, cual ta haci cu nan ta cay den un desbalanse, pa loke ta medio ambiente.

Keto bay e keho riba candela riba tereno di dump ta un dolor di cabes pa e bario. Croes a splica cu nan ta haciendo tur lo posibel pa por domina e candela ora cu esaki wordo activa.

E tema aki ta un tema pa comunidad y ta un preocupacion pa Serlimar. No obstante ta purba di tur manera of otro pa mantene e candela aki. E candela aki no necesariamente ta wordo cendi intencionalmente pa personanan cu ta haci esaki pa busca sushi, pero tin candela bao di e tera, cu ta subi na e superficie. Ta haya e cayente, candela y gas acumula y anochi por mira esaki ta spuit tambe. Mientras tanto ta cumpli cu e parti di maniobra pa controla e candela aki, cual ta responsabilidad di Serlimar te ora cu bin cu un solucion.

E unico manera cu tin awor aki pa controla e candela aki ta den e forma tradicional cu ta bay bek riba dje, ta pa pone santo y purba di mantene e candela aki pa e no escala y subi na halto riba e parti di e tera. Tabata tin partinan strategico cu e manager di Parkietenbos a trece ultimo añanan cu ta duna resultado, pero no ta duna un garantia 100% cu no ta bay haya candela. E candela lo keda presenta por lo pronto riba Parkietenbos dump, pero sinembargo ta purba di minimalisa esaki.

Represalia

Tambe ta tene cuenta di esnan cu ta bin di exterior pa subi eyriba, busca hero, koper, etc. Ta pidi varios biaha autoridad, pero hopi biaha, partinan patras ta subi riba e dump y kisas tambe hendenan cu ta wordo nenga den dia, hopi biaha tin e chens cu nan ta tuma represalia, mirando cu menasanan cu a yega di haya den pasado cu lo kima tire. Esey a yega di pasa. Pero ta purbando di tur manera pa controla e candela di dump.

Separacion di sushi

Hopi biaha Serlimar ta purba tambe, loke ta wordo tira den e parti residencial, no tin control riba dje. A purba di conscientisa comunidad si sa si tin azeta, tin tipo di sushinan manera bateria, pa separa nan, laga nan bay den otro tipo di sushi. Na dump nan ta separa e parti comercial principalmente. Tin e ‘ bunkernan’ cu a traha caminda a separa hopi hero, etc. Cartonnan tambe a inverti den ‘binders’, separando e cartonnan, nan ta wordo mara, hinca den container y bendi pa haya un suma bek, aunke e prijs di carton a baha. Por ultimo, Croes a splica cu no tin ganashi cu esaki, pero ta un forma cu sinembargo ta haci’e den forma preventivo pa evita cu tin carton riba dump.