Natalie Wolff, ”Beleids Medewerker” na Serlimar ta splica Bon Dia cu tin hopi factor ta hunga un rol den locual ta mehoracion di nan servicio y un di nan ta e cooperacion di comunidad pa cumpli cu cierto rekisitonan cu ta en cambio haci e proceso y servicio di Serlimar uno mas factibel y eficiente.
”Pa nos di Serlimar por duna e servicio como debe ser, esaki ta algo di dos banda. Pues di un banda, Serlimar ta ofrece servicio pero di otro banda nos mester e cooperacion tambe di e cliente pa asina e servicio por bay como debe ser. Pa e parti di Serlimar, loke nos ta cumpli cu ne ta cu nos tin percura pa den periodo di 1 siman nos servicio tur nos casi 40,000 cas na Aruba. Pues esey nos ta purba di haci e na un manera structura, segun un dia fiho den oranan hopi trempan di mainta y tambe den oranan tiki mas laat pa ora cu cambia di shift”, Sra. Wolff. Pa por ehecuta e servicio den un manera mas eficiente ta sumamente importante pa e cliente coopera por ehempel pa presenta e desperdicio di otro banda debidamente. Esaki kiermen cu e cliente e ora mester presenta tur siman segun e dia fiho e container pafo di cura, banda di su cura of unda cu e container aki por ta liber di obstaculo. ”Tambe tin cu zorg naturalmente pa no tin vehiculo pa stroba esaki pa nos por yega na e container. Hopi biaha cachonan agresivo ta haci hopi dificil tambe na e trahadonan pues ta pidi pa por fabor tene cuenta cu esaki. Den pasado y presente sa sosode cu nan ta morde nos trahadonan y naturalmente asina e ta imposibel pa brinda un bon servicio ”, Sra. Wolff ta bisa.
Ta conseha pa spuit bo baki di sushi cada tanto tempo
E mantencion di bo container of baki di sushi tambe ta importante y segun Sra. Wolf ta asina cu mayoria di cliente ta spuit nan baki y haci esaki cada tanto tempo y esaki no ta seguramente bon pa e trahadonan di Serlimar, pero sigur tambe pa locual ta e mantencion di bo container of baki di sushi.
”Eigenlijk esaki tambe ta un rekisito cu nos ta pidi pa no laga e baki sushi cu azeta y tipo di cosnan asina cu ta daña e container paso na final di dia, e container ta tog keda para henter e aña dilanti di bo cas”, Sra. Wolff ta comenta.
