Bon Dia a sinta cu Victor Robert, ‘Beleids Medewerker’ na Serlimar kende ta bisa cu despues di loke a sosode cu e Director Sr. Richard Fingal, el a wordo yama pa un reunion di parti di Sr. Gaby Werleman y Duke Croes pa puntra su persona si e lo ta dispuesto pa sigui cu e funcion di Director temporalmente te ora cu tin solucion. Tin hopi cos den plan aworaki y ta dificil pa introduci cambionan drastico cu no lo ta bon pa e empresa pasobra hende mester custumbra cu esaki segun Sr. Robert a splica Bon Dia.
Serlimar ainda ta superando di locual ta un caso cu no solamente a shock e compania , pero tambe sigur henter e pueblo di Aruba, cual ta e morto di director Sr. Richard Fingal. Trabaonan ta sigui manera normal sinembargo e ambiente ainda ta uno di confusion y luto cu bo por wak den cara di e trahadonan. E caso aki ta uno hopi lamentabel cu segun Sr. Robert e tabata realmente un sorpresa pasobra el a yega mainta trabao manera normal y a haya e noticia eynan. ”E famia a bin akinan siman pasa diahuebs pa bay cu su cosnan paso henter su kantoor tabata cera na yabi, nos a laga e famia saca e pertenencianan di e difunto afo y e ora nos tambe mester mira cualkier otro documento awo cu nos mester pasa den wak si nan ta finalisa si of no, pasobra si nan ta andando ainda nos mester bay sigui cu e proceso.” Sr. Robert a bisa Bon Dia.
Hopi plan y hopi trabao na caminda
Tin ariba mesa por ehempel pa drecha e dump na Parkietenbos pasobra e subida ta hopi malo anto esey lo ta cla no mas tarda cu 1 luna pasobra ta trahando riba dje caba. ”A haci pedido di dos ekipo grandi cu ta necesario, esaki tabata prome cu e difunto cual ta un ‘Excavator’ y un ‘Loader’ y ambos ta costa ariba 1 miyon florin di cual Serlimar mes ta paga esaki directamente y no gobierno” , Sr. Robert a bisa.
Pa largo plaso, Serlimar tambe kier naturalmente muda na un edificio nobo preferiblemente cerca di Parkietenbos. ”Esaki entre otro nos kier traha riba dje pues un luga mas amplio pa nos trahadonan y bishitantenan mes por para nan auto y nos lo kier bay mas cerca di Parkietenbos pero nos no ta worry si nos keda na San Nicolas pa motibo cu aworaki manera e situacion ta, comercio ta dependiendo masha hopi di Serlimar. Nos ta pro comercio San Nicolas y ta prefera cumpra cualkier producto na San Nicolas cu baha bin te abao, ademas di esey, si bay te abao tin mas consumo di gasolin of diesel y perdemento di tempo. ” Sr. Robert a bisa.
”Un cos hopi importante, cu no a bay Minister ainda pero e ta wordo trata den Hunta di Supervision diabierna awo, ta cu nos a bin cu un diferenciacion di sushi di cas. Nos a bin cu tres tarifa, pues esun 25 plus BBO, nos a bin cu un di 10 florin y tambe tarifa di 0% esey ta e personanan cu ta haya sosten financiero. Ken ta defini ken ta cay den 0 y den 10, nos ta lag’e den man di Departamento di Asuntonan Social. ” Sr. Robert ta splica Bon Dia.
Esaki ta pa motibo cu Departamento di Asuntonan Social ta e departamento di gobierno cu ta wak si un persona ta cualifica pa onderstand si of no, esaki no ta na Serlimar. Segun Sr. Robert, ta prefera un instancia imparcial di gobierno cu ta haci e. ”Locual nos ta bay haci e ora, si nan ta kere cu nan no por paga nan por bay Departamento di Asuntonan Social anto laga e departamento traha un carta pa Serlimar pa nos acepta esey pa paga of 0 of 10 florin.”
Serlimar ta sigui cu nan operacionnan y vision manera semper pa sigui brinda e pueblo di Aruba cada biaha un miho servicio.
Un di e trahadonan ta conta Bon Dia cu ta hopi tristo locual a sosode y ta bay tuma un tempo prome tur cos sinti bek ”manera normal” sinembargo trabao ta sigui y ta spera tur cos cana manera cu mester mientras e caso aki ta sigui desaroya.
