E empresa publico Serlimar SG a entrega na Corte di Promer Instancia dia 15 di mei 2020 via nan abogado, mr. David Kock, un peticion pa haya ‘surseance van betaling’. Via disposicion firma dia 19 di mei 2020, hues di Promer Instancia mr. J.J. Verhoeven, a aproba tal peticion.
Pa algun tempo caba tabata tende varios rumor encuanto e estado financiero di e compania, cu no lo por a cumpli mas cu su obligacionnan, entre nan empleado y otro acreedornan. Cu e surseance aki, cu ta un suspension di tur pago, pa duna e empresa proteccion temporal contra embargo o apropiacion di bienes cu e compania tin, sin permiso di hues o di hues-comisario. Asina ta cuminsa un periodo den cual e empresa, por trata di restructura su negoshi.
Como curator hues a nombra abogado mr. G. Rep, ken mester supervisa y autorisa pagonan cu e empresa mester/por haci. E asunto ta bolbe den corte atrobe dia 26 di augustus, ora cu Serlimar, e acreedornan conoci y e curator mester aparece, pa hues evalua si ta concede e surseance definitivo.
