Serie di sesion informativo riba Coronavirus: Pasahero di cierto pais lo mester haci un pre-screening

Ta sinti ‘pasonan di bestia grandi’ cerca nos isla relaciona cu e Coronavirus of COVID 19. “No ta cuestion cu si e virus ta yega Aruba, e ta ki dia e ta yega Aruba,” prome minister, Evelyn Wever-Croes a bisa ayera.

E hecho cu e prome caso di e virus aki a ser raporta den nos Reino cu varios caso na Hulanda. Tambe den nos region Caribe y relativamente cerca di cas, specificamente na St. Maarten, caminda e prome test a duna positivo pa e virus di COVID-19. Tur esaki a haci cu e topico aki a bira e noticia principal pa habri e siman.

Aunke te ainda no a registra niun caso na Aruba di Coronavirus, y cu no mester crea un ambiente di panico cerca nos comunidad, toch e diferente pronunciamento di varios sector y gremio ta invita nos pueblo pa ta bon prepara y tene cuenta cu e medidanan di prevencion pa evita cualkier contacto cu COVID-19.

No solamente gobierno pa medio di su ministerio y departamento di Salubridad Publico ta referi regularmente na e topico. E siman aki nan lo bin cu un serie di sesion informativo pa nos comunidad ta mas consciente di esaki. Sino tambe parlamento, sindicato y te hasta nos Diocesis a referi na e virus hopi contagioso aki.

Gobierno.
Ya den diferente ocasion gobierno a yega di vocifera cu pais Aruba ta prepara pa atende debidamente cu e Coronavirus y cu e tema aki tin nan atencion y prioridad.

Ayera Wever-Croes a indica cu e siman y e luna nobo aki ta cuminsa cu su retonan, y un di nan ta e Coronavirus. Nan ta considera e asunto aki hopi serio y nan ta preparando miho posibel p’e, y tambe nos comunidad pa medio di boletin informativo.

Te ainda decision no a cay si gobierno lo cancela e celebracion di Arubadag debi na e expansion di Coronavirus na Hulanda. Sinembargo premier Wever-Croes a informa cu gobierno pa medio di su Minister Plenipotenciario ta monitor e situacion aki, pa asina tuma e decision final. Te hasta a cera un seguro pa cubri e gastonan den caso cu mester cancela Arubadag.

Mientras cu minister di Turismo, Dangui Oduber a referi na un boletin di IATA (International Air Transport Association), y el a aclaria cu a publica un lista, caminda Aruba ta aparece, cu posiblemente ta limita e entrada di pasaheronan cu ta bin di cierto destino, entre nan China, Hapon, Sur Korea y Italia.

Segun e mandatario no ta asina cu nan ta prohibi pa bin Aruba, pero si cu e pasaheronan cu ta bin for di destinacion aki ta wordo monitor, prome cu nan ta bin Aruba. Kiermen prome cu nan ta yega Aruba, ya caba un pre-screening a tuma luga cu nan. Y na momento cu nan ta yega Aruba, nan tur ta wordo controla un biaha mas door di Departamento di Malesa Contagioso (DVZ). Nan ta medidanan di prevencion cu ta inclui te hasta pone e persona(nan) den cuarentena si ta necesario.

Tambe el a referi na e sesionnan informativo riba prevencion di COVID-19 cu ta tuma luga e dianan nos dilanti. Ayera esaki a sucede cu Ahata, pa nan informa tur e trahadonan cu ta labora den industria hotelero y turismo. Tambe anochi, hospital a tene su sesion informativo cu tur dunado di cuido.

Awe merdia DVZ lo tene un sesion en bibo, durante cual comunidad por expresa tur nan preocupacion. Igualmente awe informacion ta wordo duna na e dunado di cuido pa nos ancianonan cu ta esunnan mas vulnerabel. Tambe a manda traha un flyer cu lo bay tur adres na Aruba.

Igualmente a manda un carta na Camara di Comercio (KvK) pa tur dunado di trabou ta consciente di cierto medida di prevencion pa evita cu hende contagia di e virus aki.

Parlamento.
Ayera parlamentario y lider di fraccion di MEP, Rocco Tjon tambe a yega di expresa cu e Coronavirus ta un topico cu tin atencion di comunidad henter. El ta considera sumamente positivo cu ya caba for di ministerio di Salubridad Publico y DVZ tin hopi informacion ta wordo comparti cu pueblo.

“Tur experto ta bisa, ta hopi importante pa pueblo ta informa y pa enfoca hopi riba e parti di prevencion,” el a bisa.

E ta haya tambe cu no tin motibo pa drenta panico, pero si ta importante pa nos ta bon prepara y pa tur hende ta na haltura di e medidanan di prevencion cu lo mester tuma. El a destaca e serie di reunion informativo cu lo tuma luga entre otro cu hospital y tambe cu e miembronan di Ahata. E reunion aki tabata pa nan sa e procedemento ora cu por ehempel un turista tin e sintomanan di e Coronavirus.