Rusia lo entrega un sistema sofistica di misil anti-aereo pa Serbia, a pesar cu Merca ta adverti di posibel sancion contra Serbia en caso di compra di misil.
E agencia estatal di noticia Ruso, TASS a bisa cu lo entrega e sistema Pantsir-S na Serbia e siguiente luna di acuerdo cu e contract firma. E Enviado Special di Merca pa e region Balkan Occidental, Matthew Palmer adverti Serbia cu cumpra arma Ruso lo ‘representa un riesgo’ di sancion di Merca.
“Nos ta spera cu nos socio tin cuidou cu cualkier transaccion di e tipo aki”, Palmer a bisa durante un entrevista. Serbia ta continua como un aliado clave di Rusia, a pesar cu kier uni Union Europeo. Belgrado a compromete pa mantene na margen di OTAN y a nenga di participa den sancion occidental contra Rusia, relaciona cu e conflicto di Ucrania.
Rusia ta yudando Serbia pa reforsa nan forsa arma cu avion di combate, helicopter di atake y tanki di bataya, generando preocupacion na e region Balkan, devasta pa guera.
Durante e kiebro di ex-Yugoslavia na decada di 1990, Serbia tabata den guera cu Croacia, Bosnia y Kosovo. E presidente, Aleksander Vucic, a bisa den un entrevista cu Serbia ta cumpra arma defensivo na Rusia y cu kier evita cualkier sancion of confrontacion cu Merca.
“Serbia ta arma su mes pasobra e ta un pais liber rondona pa estadonan miembro di OTAN, cu cual nos kier ta amigabel”, Vucic a bisa, agregando y cu ‘Serbia no lo ta debil manera den decada di 1990”. E pais a wordo bombardia pa OTAN na 1999 pa stop un campaña sangriento contra Kosovo, un experiencia cu a laga e Serbionan cu desconfiansa pa e aliansa militar occidental.
Kosovo a declara su independencia di Serbia na 2008, un medida cu Belgrado y Moscu no a reconoce.
Pantsir ta un sistema di misil anti- aereo monta riba truck, cu alcance corto pa medio, cual tambe a ser manda na Siria. E por tin como obhetivo drone y misil crucero.
